1     2     3     4     5     6     7     8     9     10    11    12    13    14  15    16    17    18    19    20  

  21    22    23    24    25    26   27    28    29    30   31    32    33    34    35    36    37    38    39  40

  41    42    43    44    45    46  47  48  49  50  51  52  53  54  55  56  57  58  59  60  61  62  63 64

  65  66    67  68  69  70  71  72  73  74  75  76  77  78  79  80   81  82  83  84  85  86  87  88  89

 90  91  92  93  94  96  97  98  99  100  101  102  103  105  106  107  108  109  110  111  112

 113  114  115  116  117  118  119  120  121  122  123  124  125  126  127  128  129  130

 

श्लोक-केकीकण्ठाभनीलं सुरवरविलसद्विप्रपादाब्जजिह्नं

शोभाढ्यं पीतवस्त्रं सरसिजनयनं सर्वदा सुप्रसन्नम्।

पाणौ नाराचचापं कपिनिकरयुतं बन्धुना सेव्यमानं

नौमीड्यं जानकीशं रघुबरमनिशं पुष्पकारूढरामम्।।1।।

कौसलेन्द्रपदकञ्जमञ्जुलौ कोमलावजमहेशवन्दितौ।

जानकीकरसरोजलालितौ चिन्तकस्य मनभृङ्गसङ्गिनौ।।2।।

कुन्दइन्दु दरगौरसुन्दरं अम्बिकापतिमभीष्टसिद्धिदम्।

कारुणीककलकञ्जलोचनं नौमि शङ्करमनङ्गमोचनम्।।3।।

दोहा – रहा एक दिन अवधि कर अति आरत पुर लोग।

जहँ तहँ सोचहिं नारि नर कृस तन राम बियोग।।

सगुन होहिं सुंदर सकल मन प्रसन्न सब केर।

प्रभु आगवन जनाव जनु नगर रम्य चहुँ फेर।।

कौसल्यादि मातु सब मन अनंद अस होइ।

आयउ प्रभु श्री अनुज जुत कहन चहत अब कोइ।।

भरत नयन भुज दच्छिन फरकत बारहिं बार।

जानि सगुन मन हरष अति लागे करन बिचार।।

रहेउ एक दिन अवधि अधारा। समुझत मन दुख भयउ अपारा।।

कारन कवन नाथ नहिं आयउ। जानि कुटिल किधौं मोहि बिसरायउ।।

अहह धन्य लछिमन बड़भागी। राम पदारबिंदु अनुरागी।।

कपटी कुटिल मोहि प्रभु चीन्हा। ताते नाथ संग नहिं लीन्हा।।

                                        

जौं करनी समुझै प्रभु मोरी। नहिं निस्तार कलप सत कोरी।।

जन अवगुन प्रभु मान न काऊ। दीन बंधु अति मृदुल सुभाऊ।।

मोरे जियँ भरोस दृढ़ सोई। मिलिहहिं राम सगुन सुभ होई।।

बीतें अवधि रहहिं जौं प्राना। अधम कवन जग मोहि समाना।।

दोहा – राम बिरह सागर महँ भरत मगन मन होत।

बिप्र रूप धरि पवनसुत आइ गयउ जनु पोत।।1 क।।

बैठे देखि कुसासन जटा मुकुट कृस गात।

राम राम रघुपति जपत स्रवत नयन जल जात।।1 ख।।

देखत हनूमान अति हरषेउ। पुलक गात लोचन जल बरषेउ।।

मन महँ बहुत भाँति सुख मानी। बोलेउ श्रवन सुधा सम बानी।।

जासु बिरहँ सोचहु दिन राती। रटहु निरंतर गुन गन पाँती।।

रघुकुल तिलक सुजन सुखदाता। आयउ कुसल देव मुनि त्राता।।

रिपु रन जीति सुजस सुर गावत। सीता सहित अनुज प्रभु आवत।।

                                        

सुनत बचन बिसरे सब दूखा। तृषावंत जिमि पाइ पियूषा।।

को तुम्ह तात कहाँ ते आए। मोहि परम प्रिय बचन सुनाए।।

मारुतसुत मैं कपि हनुमाना नामु मोर सुनु कृपानिधाना।।

दीनबंधु रघुपति कर किंकर। सुनत भरत भेंटेउ उठि सादर।।

मिलत प्रेम नहिं हृदयँ समाता। नयन स्रवत जल पुलकित गाता।।

कपि तव दरस सकल दुख बीते। मिले आजु मोहि राम पिरीते।।

बार बार बूझी कुसलाता। ते कहुँ देउँ काह सुनु भ्राता।।

एहि संदेस सरिस जग माहिं। करि बिचार देखेउँ कछु नाहीं।।

नाहिन तात उरिन मैं तोही। अब प्रभु चरित सुनावहु मोही।।

तब हनुमंत नाइ पद माथा। कहे सकल रघुपति गुन गाथा।।

कहु कपि कबहुँकृपाल गोसाईं। सुमिरहिं मोहि दास की नाईं।।

छन्द – निज दास ज्यों रघुबंसभूषन कबहुँ मम सुमिरन कर्यो।

सुनि भरत बचन बिनीत अति कपि पुलकि तन चरनन्हि पर्यो।।

रघुबीर निज मुख जासु गुन गन कहत अग जग नाथ जो।

काहे न होइ बिनीत परम पुनीत सदगुन सिंधु सो।।

दोहा – राम प्रान प्रिय नाथ तुम्ह सत्य बचन मम तात।

                                        

पुनि पुनि मिलत भरत सुनि हरष न हृदयँ समात।।2 क।।

सोरठा – भरत चरन सिरु नाइ तुरित गयउ कपि राम पहिं।

कही कुसल सब जाइ हरषि चलेउ प्रभु जान चढ़ि।। 2ख।।

हरषि भरत कोसलपुर आए। समाचार सब गुरहि सुनाए।।

पुनि मंदिर महँ बात जनाई। आवत नगर कुसल रघुराई।।

सुनत सकल जननीं उठि धाईं। कहि प्रभउ कुसल भरत समुझाईं।।

समाचार पुरबासिन्ह पाए। नर अरु नारि हरषि सब धाए।।

दधि दुर्बा रोचन फल फूला। नव तुलसी दल मंगल मूला.।

भरि भरि हेम थार भामिनी। गावत चलिं सिंधुरगामिनी।।

जे जैसेहिं तेसैहिं उठि धावहिं। बाल बृद्ध कहँ संग न लावहिं।।

एक एकन्ह कहँ बूझहिं भाई। तुम्ह देखे दयाल रघुराई।।

अवधपुरी प्रभु आवत जानी। भई सकल सोभा कै खानी।।

बहइ सुहावन त्रिबिध समीरा। भइ सरजू अति निर्मल नीरा।।

                                        

दोहा – हरषित गुर परिजन अनुज भूसुर बृंद समेत।

चले भरत मन प्रेम अति सन्मुख कृपानिकेत।।3 क।।

बहुतक चढ़ीं अटारिन्ह निरखहिं गगन बिमान।

देखि मधुर सुर हरषित करहिं सुमंगल गान।।3 ख।।

राका ससि रघुपति पुर सिंधु देखि हरषान।

बढ़्यो कोलाहल करत जनु नारि तरंग समान।। 3 ग।।

इहाँ भानुकुल कमल दिवाकर। कपिन्ह देखावत नगर मनोहर।।

सुनु कपीस अंगद लंकेसा। पावन पुरी रुचिर यह देसा।।

जद्यपि सब बैकुंठ बखाना। बेद पुरान बिदित जगु जाना।।

अवधपुरी सम प्रिय नहिं सोऊ। यह प्रसंग जानइ कोउ कोऊ।।

जन्मभूमि मम पुरी सुहावनि। उत्तर दिसि बह सरजू पावनि।।

जा मज्जन ते बिनहिं प्रयासा। मम समीप नर पावहिं बासा।।

अति प्रिय मोहि इहाँ के बासी। मम धामदा पुरी सुख रासी।।

हरषे सब कपि सुनि प्रभु बानी। धन्य अबध जो राम बखानी।।

दोहा – आवत देखि लोग सब कृपासिंधु भगवान।

                                        

नगर निकट प्रभु प्रेरेउ उतरेउ भूमि बिमान।। 4 क।।

उतरि कहेउ प्रभु पुष्पकहि तुम्ह कुबेर पहिं जाहु।

प्रेरित राम चलेउ सो हरषु बिरहु अति ताहु।। 4 ख।।
आए भरत संग सब लोगा। कृस तन श्रीरघुबीर बियोगा।।

बामदेव बसिष्ट मुनिनायक। देखे प्रभु महि धरि धनु सायक।।

धाइ धरे गुर चरन सरोरुह। अनुज सहित अति पुलक तनोरुह।।

भेंटि कुसल बूझी मुनिराया। हमरें कुरसल तुम्हारिहिं दाया।।

सकल द्विजन्ह मिलि नायउ माथा। धर्म धुरंधर रघुकुलनाथा।।

गहे भरत पुनि प्रभु पद पंकज। नमत जिन्हहि सुर मुनि संकर अज।।

परे भूमि नहिं उठत उठाए। बर करि कृपासिंधु उर लाए।।

स्यामल गात रोम भए ठाढ़े। नव राजीव नयन जल बाढ़े।।

छन्द – राजीव लोचन स्रवत जल तन ललित पुलकावलि बनी।

अति प्रेम हृदयँ लगाइ अनुजहि मिले प्रभु त्रिभुअन धनी।।

प्रभु मिलत अनुजाहि सोह मो पहिं जाति नहिं उपमा कही।

जनु प्रेम अरु सिंगार तनु धरि मिले बर सुषमा लही।।1।।

बूझत कृपानिधि कुसल भरतहि बचन बेगि न आवई।

सुनु सिवा सो सुख बचन मन ते भिन्न जान जो पावई।।

अब कुसल कौसलनाथ आरत जानि जन दरसन दियो।।

बूड़त बिरह बारीस कृपानिधान मोहि कर गहि लियो।।2।।

दोहा – पुनि प्रभु हरषि सत्रुहन भेंटे हृदयँ लगाइ।

लछिमन भरत मिले तब परम प्रेम दोउ भाइ।।5।।

                                        

भरतानुज लछिमन पुनि भेटे। दुसह बिरह संभव दुख मेटे ।।

सीता चरन भरत सिरु नावा। अनुज समेतपरम सुख पावा।।

प्रभु बिलोकि हरषे पुरबासी। जनित बियोग बिपति सबनासी।।

प्रेमातुर सब लोग निहारी। कौतुक कीन्ह कृपाल खरारी।।

अमित रूप प्रगटे तेहि काला। जथा जोग मिले सबहि कृपाला।।

कृपादृष्टि रघुबीर बिलोकी। किए सकल नर नारि बिसोकी।।

छन महिं सबहि मिले भगवाना। उमा मरम यह काहुँ न जाना।।

एहि बिधि सबहि सुखी करिरामा। आगें चले सीलगुन धामा।।

कौसल्यादि मातु सब धाई। निरखि बच्छ जनु धेनु लवाई।।

छन्द- जनु धेनु बालक बच्छ तजि गृहँ चरन बन परबस गईं।

दिन अंत पुर रुख स्रवत थन हुँकार करि धावत भईं।।

अति प्रेम प्रभु सब मातु भेटीं बचन मृदु बहु बिधि कहे।

गइ बषम बिपति बियोग भव तिन्ह हरष सुख अगनित लहे।।

दोहा- भेटेउ तनय सुमित्राँ राम चरन रति जानि।

रामहि मिलत कैकई हृदयँ बहुत सकुचानि।।6क।।

लछिमन सब मातन्ह मिलि हरषे आसिष पाइ।

                                        

कैकइ कहँ पुनि पुनि मिले मनकर छोभि न जाइ।।6ख।।

सासुन्ह सबनि मिली बैदेही। चरनन्हि लागि हरषु अति तेही।।

देहि असीस बूझि कुसलाता। होइ अचल तुम्हार अहिवाता।

सबरघुपति मुख कमल बिलोकहिं। मंगल जानि नयन जल रोकहिं।।

कनक थार आरती उतारहि। बार बार प्रभु गात निहारहिं ।।

नाना भाँति निछावरि करही। परमानंद हरष उर भरहीं ।।

कौसल्या पुनि पुनि रघुबीरहि। चितवति कृपासिंधु रनधीरहि।।

हृदयँ बिचारति बारहिं बारा। कवन भाँति लंकापति मारा।।

अति सुकुमार जुगल मेरे बारे। निसिचर सुभट महाबल भारे।।

दोहा – लछिमन अरु सीता सहित प्रभुहि बिलोकति मातु।

परमानंद मगन मन पुनि पुनि पुलकित गातु।।7।।

लंकापति कपूस नल नीला। जामवंत अंगद सुभसीला।।

हनुमदादि सब बानर बीरा। धरे मनोहर मनुज सरीरा।।

भरत सनेह सील ब्रत नेमा। सादर सब बरनहिं अति प्रेमा।।

देखि नगरबासिन्ह कै रीती। सकल सराहहिं प्रभु पद प्रीती।।

                                        

पुनि रघुपति सब सखा बोलाए। मुनि पद लागहु सकल सिखाए।।

गुर बसिष्ट कुलपूज्य हमारे। इन्ह की कृपा दनुज रन मारे।।

ए सब सखा सुनहु मुनि मेरे। भए समर सागर कहँ बेरे।।
मम हित लागि जन्म इन्ह हारे। भरतहु ते मोहि अधिक पिआरे।।

सुनि प्रभु बचन मगन सब भए। निमिष निमिष उपजत सुख नए।।

दोहा – कौसल्या के चरनन्हि पुनि तिन्ह नायउ माथ।

आसिष दीन्हे हरषि तुम्ह प्रिय मम जिमि रघुनाथ।।8ख।।

सुमन बृष्टि नभ संकुल भवन चले सुखकंद।

चढ़ी अटारिन्ह देखहिं नगर नारि नर बृंद।।8ख।।

कंचन कलस बिचित्र सँवारे। सबहिं धरे सजि निज निज द्वारे।।

बंदनवार पताका केतु। सबन्हि बनाए मंगल हेतु।

बीथीं सकल सुगंध सिंचाई। गजमनि रचि बहु चौक पुराई।।

नाना भाँति सुमंगल साजे। हरषि नगर निसान बहु बाजे।।

जहँ तहँ नारि निछावरि करहीं। देहिं असीस हरष उर भरहीं।।

कंचन थार आरतीं नाना। जुबतीं सजें करहिं सुभ गाना।।

करहिं आरती आरतिहर कें। रघुकुल कमल बिपिन दिनकरकें।

पुर सोभा संपति कल्याना। निगम सेष सारदा बखाना।

                                        

तेउ यह चरित देखि ठगि रहहीं। उमा तासु गुन नर किमि कहहीं।।

दोहा- नारि कुमुदिनीं अवध सर रघुपति बिरह दिनेस

अस्त भएँ बिगसत भईं निरखि राम राकेस।।9क।।

होहिं सगुन सुभ बिबिधि बिधि बाजहिं गगन निसान।।

पुर नर नारि सनाथ करि भवन चले भगवान।।9ख।।

प्रभु जानी कैकई लजानी। प्रथम तासु गृह गए भवानी।।

ताहि प्रबोधि बहुत सुख दीन्हा। पुनि निज भवन गवन हरिकीन्हा।।

कृपासिंधु जब मंदिर गए। पुर नर नारि सुखी सब भए।।

गुर बसिष्ट द्विज लिए बोलाई। आजु सुधरी सुदिन समुदाई।।

सब द्विज देहु हरषु अनुसासन। रामचंद्र बैठहिं सिंघासन।।

मुनि बसिष्ठ के बचन सुहाए। सुनत सकल बिप्रन्ह अति भाए।।

कहहिं बचन मृदु बिप्र अनेका। जग अभिराम राम अभिषेका।।

अब मुनिबर बिलंब नहिं कीजै। महाराज कहँ तिलक करीजै।।

दोहा – तब मुनि कहेउ सुमंत्र सन सुनत चलेउ हरषाइ।

रथ अनेक बहु बाजि गज तुरत सँवारे जाइ।।10क।।

                                        

जहँ तहँ धावन पठइ पुनि मंगल द्रब्य मगाई।
हरष समेत बसिष्ट पद पुनि सिरु नायउ आइ।।10ख।।

अवधपुरी अति रुचिर बनाई। देवन्ह सुमन बृष्टि झरि लाई।।

राम कहा सेवकन्ह बुलाई। प्रथम सखन्ह अन्हवावहु जाई।।

सुनत बचन जहँ तहँ जन धाए। सुग्रीवादि तुरत अन्हवाए।।
पुनि करुनानिधि भरतु हँकारे। निज कर राम जटा निरुआरे।।

अन्हवाए प्रभु तीनिउ भाई। भगत बछल कृपाल रघुराई।।

भरत भाग्य प्रभु कोमलताई। सेष कोटि सत सकहिं न गाई।।

पुनि निज जटा राम बिबराए। गुर अनुसासन मागि नहाए।।

करि मज्जन प्रभु भूषन साजे। अंग अनंग देखि सत लाजे।।

दोहा- सासुन्ह सादर जानकिहि मज्जन तुरत कराइ।

दिब्य बसन बर भूषन अँग अँग सजे बनाइ।।11क।।

राम बाम दिसि सोभति रमा रूप गुन खानि।

देखि मातु सब हरषीं जन्म सुफल निज जानि।।11ख।।

सुनु खगेस तेहि अवसर ब्रह्मा सिव मुनि बृंद।

                                        

चढ़ि बिमान आए सब सुर देखन सुखकंद।।11ग।।

प्रभु बिलोकि मुनि मन अनुरागा। तुरत दिब्य सिंघासन मागा।।

रबि सम तेज सो बरनि न जाई। बैठे राम द्विजन्ह सिरु नाई।

जनकसुता समेत रघुराई। पेखि प्रहरषे मुनि समुदाई।।

बेद मन्त्र तब द्विजन्ह उचारे। नभ सुर मुनि जय जयति पुकारे।।

प्रथम तिलकबसिष्ट मुनिकीन्हा। पुनि सब बिप्रन्ह आयसु दीन्हा।।

सुत बिलोकि हरषीं महतारी। बार बार आरती उतारी।।

बिप्रन्ह दान बिबिध बिधि दीन्हे। जाचक सकल अजाचक कीन्हे।।

सिंघासन पर त्रिभुअन साई। देखि सुरन्ह दुंदुभीं बजाई।।

छन्द- नभ दुंदुभीं बाजहिं बिपुल गंधर्व किंनर गावहीं।

नाचहिं अपछरा बृंद परमानन्द सुर मुनि पाबहीं।।

भरतादि अनुज बिभीषनांगद हनुमदादि समेत ते।

गहें छत्र चामर ब्यजन धनु असि चर्म सक्ति विराजते।।

श्री सहित दिनकर बंस भूषन काम बहु छबि सोहई।

नव अंबुधर बर गात अंबर पूत सुर मन मोहई।।

मुकुटांगदादि बिचित्र भूषन अंग अंगन्हि प्रति सजे।

                                        

अंभोज नयन बिसाल उर भुज धन्य नर निरखंति जे।।2।।

दोहा- बह सोभा समाज सुख कहत न बनइ खगेस।

बरनहिं सारद सेष श्रुति सो रस जान महेस।।12क।।

भिन्न भिन्न अस्तुति करि गए सुर निज निज धाम।

बंदी बेष बेद तब आए जहँ श्रीराम।।12ख।।

प्रभु सर्बग्य कीन्ह अति आंदर कृपानिधान।

लखेउ न काहूँ मनम कछु लगे करन गुन गान।।12ग।।

छन्द जय सगुन निर्घुन रुप रुप अनूप भूप सिरोमने।

दसकंधरादि प्रचंज निसिचर प्रबल खल भुज बल हने।।

दोहा- अवतार नर संसार भार विभंजि दारुन दुख दहै।

जय प्रनतपाल दयाल प्रभु संजुक्त सक्ति नमामहे।।1।।

तव बिषम माया बस सुरासुर नाग नर अग जग हरे।

भव पंथ भ्रमत अमित दिवस निसि काल कर्म गुननि भरे।।

जे नाथ करि करुना बिलोक त्रिबिधि दुख ते निर्बहे।

भव खेद छेदन दच्छ हम कहुँ रच्छ राम नमामहे।।2।।

                                        

जे ग्यान मान बिमत्त तव भव हरनि भक्ति न आदरी।

ते पाइ सुर दुर्लभ पदादपि परत हम देखत हरी।।

बिस्वास करि सब आस परिहरि दास तव जे होइ रहे।

जपि नाम तब बिनु श्रम तरहिं भव नाथ सो समरामहे।।3।।

जे चरन सिव अज पूज्य रज सुभ परसि मुनिपतिनी तरी।

नख निर्गता मुनि बंदिता त्रैलोक पावनि सुरसरी।।

ध्वज कुलिस अंकुस कंज जुत बन फिरत कंटक किन लहे।

पद कंज द्वंद मुकुन्द राम रमेस नित्य भजामहे।।4।।

अब्यक्तमूलमनादि तरु त्वच चारि निगमागम भने।

षट कंध साखा पंच बीस अनेक पर्न सुमन घने।।

फल जुगल बिधि कटु मधुर बेलि अकेलि जेहि आश्रित रहे।

पल्लवतफूलत नवल नित संसार बिटप नमामहे।।5।।

जे ब्रह्म अजमद्वैतमनुभवगम्य मनपर ध्यावहीं।

ते कहहुँ जानहुँ नाथ हम तव सगुन जस नित गावहीं।।

करुनायतन प्रभु सदगुनाकर देव यह बर मागहीं।

                                        

मन बचन कर्म बिकार तजि कब चरन हम अनुरागहीं।।6।।

दोहा – सब के देखत बेदन्ह विनती कीन्हि उदार।

अंतर्धान भए पुनि गए ब्रह्म आगार।।13क।।

बैनतेय सुनु संभु तब आए जहे रघुबीर।

बिनय करत गदगद गिरा पूरित पुलक सरीर।।13ख।।

छन्द- जय राम रमारमनं समनं। भव ताप भयाकुल पाहि जनं।

अवधेस सुरस रमेस बिभो। सरनागत मागत पाहि प्रभो।।

दससीस बिनासन बीस भुजा। कृत गुरि मह्य महि भूरि रुजा।।

रजनीचर बृंद पतंग रह। सर पावक तेज प्रचंड दहे।।

महि मंडल मंडन चारुतरं। धृत सायक चाप निंग बरं।।

मद मोह महा ममता रजनी। तम पुंज दिवाकर तेज अनी।।

मनजात किरात निपात किए। मृग लोग कुभोग सरेन हिए।।

हति नाथ अनाथनि पाहि हरे। बिषया बन पावँर भूलि परे।।

बहु रोग बियोगन्हि लोग बए। भवदंघ्रि निरादर के फल ए।।

भव सिंधु अगाध परे नर ते। पद पंकज प्रेम न जे करते।।

                                        

अति दीन मलीन दुखी नितहिं। जिन्ह कें पद पंकज प्रीति नहीं।।

अवलंब भवंत कथा जिन्ह कें। प्रिय संत अनंत सदा तिन्ह के।।

नहि राग न लोभ न मान मदा। तिन्ह के सम बैभव व बिपदा।।

एहि ते तब सेवक होत मुदा। मुनि त्यागत जोग भरोस सदा।।

करि प्रेम निरंतर नेम लिएँ। पद पंकज सेवत सुद्ध हिएँ।।

सम मानि निरादर आदरही। सब संत सुखी बिचरंति मही।।

मुनि मानस पंकज भृंग भजे। रघुबीर महा रनधीर अजे।।

तब नाम जपामि नमामि हरी। भव रोग महागद मान अरी।।

गुन सील कृपा परमायतनं। प्रनमामि निरंतर श्रीरमनं।।

रघुनंद निकंदय द्वंद्वघनं। महिपाल बिलोकय दीन जलं।।

दोहा-  बार बार बर मागउँ हरषि देहु श्रीरंग।

पद सरोज अनपायनी भगति सदा सतसंग।।14क।।

बरनि उमापति राम गुन हरषि गए कैलास।

तब प्रभु कपिन्ह दिवाए सब बिधि सुखप्रद बास।।14ख।।

सुनु खगपति यह कथा पावनी। त्रिबिध ताप भव भय दावनी।।

                                        

महाराज कर सुभ अभिषेका। सुनत लहहिं नरबिरति बिवेका।।

जे सकाम नर सुनहिं जे गावहिं। सुख संपति नाना बिधि पाहहिं।।

सुर दुर्लभ सुखकरि जग माहीं। अंतकाल रघुपति पुर जाहीं।।

सुनहिं बिमुक्त बिरत अरु बिषई। लहहिं भगति गति संपति नई।।

खगपति राम कथा मैं बरनी। स्वमति बिलासत्रास दुख हरनी।।

बिरति बिबेक भगति दृढ़ करनी। मोह नदी कहँ सुन्दर तरनी।।

नित नव मंगल कौसलपुरी। हरषित रहहहिं लोग सब कुरी।।

नित नइ प्रीति राम पद पंकज। सबकें जिन्हहि नमत सिव मुनि अज।।

मंगन बहु प्रकार पहिराए। द्विजन्ह दान नाना बिधि पाए।।

दोहा- ब्रह्मानंद मगन कपि सब कें प्रभु पद प्रीति।

जात न जाने दिवस तिन्ह गए मास षट बीति।।15।।

बिसरे गृह सपनेहुँ सुधि नाहीं। जिमि परद्रोह संत मन माहीं।।

तब रघुपति सब सखा बोलाए। आइ सबन्हि सादर सिरु नाए।।

परम प्रीति समीप बैठारे। भगत सुखद मृदु बचन उचारे।।

तुम्ह अति कीन्हि मोरि सेवकाई। मुख पर केहि बिधि करौं बड़ाई।।

ताते मोहि तुम्ह अति प्रिय लागे। मम हित लागि भवन सुख त्यागे।।

                                        

अनुज राज संपति बैदेही। देह गेह परिवार सनेही।।

सब मम प्रिय नहिं तुम्हहि समाना। मृषा न कहउँ मोर यह बाना।।

सब कें प्रिय सेवक यह नीती। मोरें अधिक दास पर प्रीती।।

दोहा-अब गृह जाहु सखा सब भजेहु मोहि दृढ़ नेम।

सदा सर्बगत सर्बहित जानि करेहु अति प्रेम।।16।।

सुनि प्रभु बचन मगन सब भए। को हम कहाँ बिसरि तन गए।।

एकटक रहे जोरि कर आगे। सकहिं न कछु कहि अति अनुरागे।।

परम प्रेम तिन्ह कर प्रभु देखा। कहा बिबिधि बिधि ग्यान बिसेषा।।

प्रभु सन्मुख कछु कहन न पारहिं। पुनि पुनि चरन सरोज निहारहिं।।

तब प्रभु भूषन बसन  मगाए। नाना रंग अनूप सुहाए।।

सुग्रीवहि प्रथमहि पहिराए। बसन भरत निज हाथ बनाए।।

प्रभु प्रेरित लछिमन पहिराए। लंकापति रघुपति मन भाए।।

अंगद बैठ रहा नहिं डोला। प्रीति देखि प्रभु ताहि न बोला।।

दोहा-जामवंत नीलादि सब पहिराए रघुनाथ।

हियँ धरि राम रूप सब चले नाइ पद माथ।।17क।।

तब अंगद उठि नाइ सिरु सजल नयन कर जोरि।

अति बिनीत बोलेउ बचन मनहुँ प्रेम रस बोरि।।17ख।।

सुनु सर्बग्य कृपा सुख सिंधो। दीन दयाकर आरत बंधो।।

मरती बेर नाथ मोहि बाली। गयउ तुम्हारेहि कोंछें घाली।।

                                        

असरन सरन बिरदु संभारी। मोहि जनि तजहु भगत हितकारी।.

मोरें तुम्ह प्रभु गुर पितु माता। जाउँ कहाँ तजि पद जलजाता।।

तुम्हहि बिचारि कहहु नरनाहा। प्रभु तजि भवन काज मम काहा।।

बालक ग्यान बुद्धि बल हीना। राखहु सरन नाथ जन दीना।।

नीचि टहल गृह कै सब करहउँ। पद पंकज बिलोकि भव तरिहउँ।।

अस कहि चरन परेउ प्रभु पाही। अब जनि नाथ कहहु गृह जाही।।

दोहा-अंगद बचन बिनीत सुनि रघुपति करुना सींव।

प्रभु उठाइ उर लायउ सजल नयन राजीव।।18क।।

निज उर माल बसन मनि बालितनय पहिराइ।

बिदा कीन्हि भगवान तब बहु प्रकार समुझाइ।।18ख।।

भरत अनुज सौमित्र समेता। पठवन चले भगत कृत चेता।।

अंगद हृदयँ प्रेम नहिं थोरा। फिरि फिरि चितव राम कीं ओरा।।

बार बार कर दंड प्रनामा। मन अस रहन कहहिं मोहि रामा।।

राम बिलोकनि बोलनि चलनी। सुमिरि सोचन हँसि मिलनी।।

प्रभु रुख देखि बिनय बहु भाषी। चलेउ हृदयँ पद पंकज राखी।।

अति आदर सब कपि पहुँचाए। भाइन्ह सहित भरत पुनि आए।।

                                        

तब सुग्रीव चरन गहि नाना। भाँति बिनय कीन्हे हनुमाना।।

दिन दस करि रघुपति पद सेवा। पुनि तब चरन देखिहउँ देवा।।

पुन्य पुंज तुम्ह पवनकुमारा। सेवहु जाइ कृपा आगारा।।

अस कहि कपि सब चले तुरंता। अंगद कहइ सुनहु हनुमंता।।

दोहा-कहेहु दंडवत प्रभु सैं तुम्हहि कहउँ कर जोहि।

बार बार रघुनायकहि सुरति कराएहु मोरि।।19क।।

अस कहि चलेउ बालिसुत फिरि आयउ हनुमंत।

तासु प्रीति प्रभु सन कही मगन भए भगवंत।।19ख।।

कुलिसहु चाहि कटोर अति कोमल कुसुमहु चाहि।

चित्त खगेस राम कर समुझि परइ कहु काहि।।19ग।।

पुनि कृपाल लियो बोलि निषादा। दीन्हे भूषन बसन प्रसादा।।

जाहु भवन मम सुमिरन करेहु। मन क्रम बचन धर्म अनुसरेहू।।

तुम्ह मम सखा भरत सम भ्राता। सदा रहेहु पुर आवत जाता।।

                                        

बचन सुनत उपजा सुख भारी। परेउ चरन भरि लोजन बारी।।

चरन नलिन उर धरि गृह आवा। प्रभु सुभाउ परिजनन्हि सुनावा।।

रघुपति चरित देखि पुरबासी। पुनि पुनि कहहिं धन्य सुखरासी।।

राम राज बैठें त्रैलोका। हरषित भए गए सब सोका।।

बयरु न कर काहू सन कोई। राम प्रताप बिषमता खोई।।

दोहा- बरनाश्रम निज निज धरम निरत बेद पथ लोग।

चलहिं सदा पावहिं सुखहिं नहिं भय सोक न रोग।।20।।

दैहिक दैविक भौतिक तापा। राम राज नहिं काहुहि ब्यापा।।

सब नर करहिं परस्पर प्रीति। जलहिं स्वधर्म निरत श्रुति नीती।।

चारिउ चरन धर्म जग माहीं। पूरि रहा सपनेहुँ अघ नहीं।।

राम भगति रत नर अरु नारी।। सकल परम गति के अधिकारी।।

अल्पमृत्यु नहिं कवनिउ पीरा। सब सुंदर सब बिरुज सरीरा।।

नहिं दरिद्र कोउ दुखी न दीना। नहिं कोउ अबुध न लच्छनहीना।।

सब निर्दभ धर्मरत पुनी। नर अरु नारि चतुर सब गुनी।।

सब गुनग्य पंडित सब ग्यानी। सब कृतग्य नहिं कपट सयानी।।

                                        

दोहा – राम राज नभगेस सुनु सचराचर जग माहिं।

काल कर्म सुभाव गुन कृत दुख काहुहि नाहिं।।21।।

भूमि सप्त सागर मेखला। एक भूप रघुपति कोसला।।

भुअन अनेक रोम प्रति जासू। यह प्रभुता कुछुबहुत न तासू।

सो महिमा समुझत प्रभु केरी। यह बरनत हीनता घनेरी।।

सोंउ महिमा खगेस जिन्ह जानी। फिरिएहिं चरित तिन्हहुँ रतिमानी।।

सोउ जाने कर फल यह लीला। कहहिं महा मुनिबर दमसीला।

राम राज कर सुख संपदा। बरनि न सकइ फनीस सारदा।।

सह उदार सब पर उपकारी। विप्र चरन सेवक नर रारी।।

एकनारि ब्रत रत सब झारी। ते मन बच क्रम पति हितकारी।।

दोहा- दंड जतिन्ह कर भेद जहँ नर्तक नृत्य समाज।

जीतुहु मनहि सुनिअ अस रामचंद्र कें राज।।22।।

फूलहिं फरहिं सदा तरु कानन। रहहिं एक सँग गज पंचानन।।

खग मृग सहज बयरु बिसराई। सबन्हि परस्पर प्रीति बढ़ाई।।

कूजहिं खग मृग नाना बृंदा। अभय चरहिं बन करहिं अनंदा।।

                                        

सीतल सुरभि पवन बह मंदा।। गुंजत अलि लै चलि मकरंदा।।

लता बिटप मागें मधु चलहीं। मनभावतो धेनु पय स्रवहीं।।

ससि संपन्न सदा रह धरनी। त्रेताँ भइ कृतजुग कै करनी।।

प्रगटीं गिरिन्ह बिबिधि मनिखानी। जगदातमा भूप जग जानी।।

सरिता सकल बहहिं बर बारी। सीतल अमल स्वाद सुखकारी।

सागर निज मरजादाँ रहहीं। डारहिं रत्न तटन्हि नर लहहीं।।

सरसिज संकुल सकल तड़ागा। अति प्रसन्न दस दिसा बिभागा।।

दोहा – बिधु महि पूर मयूखन्हि रबि तप जेतनेहि काज।

मागें बारिद देहिं जल रामचन्द्र कें राज।।23।।

कोटिन्ह बाजिमेध प्रभु कीन्हे। दान अनेक द्विजन्ह कहँ दीन्हे।

श्रुति पथ पालक धर्म धुरंधर। गुनातीत अरु भोग पुरंदर।।

पति अनुकूल सदा रह सीता। सोभा खानि सुसील बिनीता।।

जानति कृपासिंधु प्रभुताई। सेवित चरन कमल मन लाई।।

जद्यपि गृहँ सेवक सेवकिनी। बिपुल सदा सेवा बिधि गुनी।।

निज कर गृह परिचरजा करई। रामचन्द्र आयसु अनुसरई।।

                                        

जेहि बिधि कृपासिंधु सुख मानइ। सोइ कर श्री सेवाबिधि जानइ।।

कौसल्यादि सासु गृह माहीं। सेवइ सबन्हि मान मद नाहीं।।

उमा रमा ब्रह्मादि बंदिता। जगदंबा संततमनिंदिता।।

दोहा-जासु कृपा कटाच्छु सुर चाहत चितव न सोइ।

राम पदारबिंद रति करति सुभावहि खोइ।।24।।

सेवहिं सानकूल सब भाई। रामचरन रति अति अधिकाई।।

फ्रभि मुख कमल बिलोकत रहहीं। कबहुँ कृपाल हमहि कछु कहहीं।।

राम करहिं भ्रातन्ह पर प्रीती। नाना भाँति सिखावहिं नीती।।

हरषित रहहिं नगर के लोगा। करहिं सकल सुर दुर्लभ भोगा।।

अहनिसि बिधिहि मनावत रहहीं। श्रीरघुबीर चरन रति चहहीं।।

दुइ सुत सुंदर सीताँ जाए। लब कुस बेद पुरानन्ह गाए।।

दोउ बिजई बिनई गुन मंदिर। हरि प्रतिबंब मनहुँ अति सुंदर।।

दुइ दुइ सुत सब भ्रातन्ह केरे। भए रुप गुन सील घनेरे।।

दोहा-ग्यान गिरा गोतीत अज माया मन गुन पार।

सोइ सच्चिदानन्द घन कर नर चरित उदार।।25।।

                                        

प्रातकाल सरऊ करि मज्जन। बैठहिं सभाँ संग द्विज सज्जन।।

बेद पुरान बसिष्ट बखानहिं। सुनहिं राम जद्यपि सब जानहिं।।

अनुजन्ह संजुत भोजन करहीं। देखि सकल जननीं सुख भरहीं।।

भरत सत्रुहन दोनउ भाई। सहित पवनसुत उपबन जाई।।

बूझहिं बैठि राम गुन गाहा। कह हनुमान सुमति अवगाहा।।

सुनत बिमल गुन अति सुखपावहिं। बहुरि बहुरि करि बिनय कहावहिं।।

सब के गृह गृह होहिं पिराना। राम चरित पावन बिधि नाना।।

नर अरु नारि रामगुन गानहिं। करहिं दिवसनिसि जात न जानहिं।।

दोहा- अवधपुरी बासिन्ह कर सुख संपदा समाज।

सहस सेष नहिं कहि सकहिं जहँ नृप राम बिराज।।26।।

नारदादि सनकादि मुनीसा। दरसन लागि कोसलाधीसा।।

दिनप्रति सकल अजोद्या आवहिं। देखि नगरु बिरागु बिसारावहिं।।

जातरूप मुनि रचित अटारीं। नाना रंग रुचिर गच ढारी।।

पुर चहुँ पास कोट अति सुन्दर। रचे कँगूरा रंग रंग बर।।

नवग्रह निकर अनीक बनाई। जनु घेरी अमरावति आई।।

                                        

महि बहु रंग रचित गच काँचा। जो बिलोकि मुनिबर मननाचा।।

धवल धाम ऊपर नभ चुंबत। कलस मनहुँ रवि ससि दुति निंदत।।

बहु मुनि रचित झरोखा भ्राजहिं। गृह गृह प्रतिमनिदीप बिराजहिं।।

छन्द-मनि दीप राजहिं भवन भ्राजहिं देहरीं बिद्रुम रची।

मनि खंभ भीति बिरंचि बिरची कनक मनि मरकत खची।।

सुंदर मनोहर मंदिरायत अजिर रुचिर फटिक रचे।

प्रति द्वार द्वार कपाट पुरट बनाइ बरु बज्रन्हि खचे।।

दोहा- चारु चित्रसाला गृह गृह प्रति लिखे बनाइ।

राम चरित जे निरखि मुनि तेमन लेहिं चोराइ।।27।।

सुमन वाटिका सबहिं लगाई। बिबिध भाँति करि जतन बनाई।।

लता ललित बहु जाति सुहाई। फूलहिं सदा बसंत कि नाईं।।

गुंजत मधुकर मुखर मनोहर। मारुत त्रिविध सदा बह सुन्दर।।

नाना खग बालकन्हि जिआए। बोलत मधुर उड़ात सुहाए।।

मोर हंस सारस पारावत। भवननि पर सोभा अति पावत।।

जहँ तहँ देखहिं निज परिछाहीं। बहु विधि कूजहिं नृत्य कराहीं।।

सुक सारिका पढ़ावहि बासक। कहहु राम रघुपति जनपालक।।

                                        

राज दुआर सकल बिधि चारू। बीथीं चौहट रुचिर बजारू।।

छन्द- बाजार रुचिर न बनइ बरनत बस्तु बिनु गथ पाइए।

जहँ भूप रमानिवास तहँ की संपदा किमि गाइए।।

बैठे बजाज सराफ बनिक अनेक मनहुँ कुबेर ते।

सब सुखी सब सच्चरित सुंदर नारि नर सिसु जरठ जे।

दोहा- उत्तर दिसि सरजू बह निर्मल जल गंभीर।

बाँधे घाट मनोहर स्वल्प पंक नहिं तीर।।28।।

दूरि फराक रुचिर सो घाटा। जहँ जल पिअहिं बाजिगज ठाटा।।

पनिघट परम मनोहर नाना। तहाँ न पुरुष करहिं अस्नाना।।

राजघाट सब बिधि सुंदर बर। मज्जहिं तहाँ बरन चारिउ नर।।

तीर तीर देवन्ह के मंदिर। चहुँ दिसि तिन्ह के उपबनसुंदर।।

कहुँ कहुँ सरिता तीर उदासी। बसहिं ग्यान रत मुनि संन्यासी।।

तीर तीर तुलसिका सुहाई। बृंद बृंद बहु मुनिन्ह लगाई।।

पुर सोभा कछु बरनि न जाई। बाहेर नगर परम रुचिराई।।

देखतपुरी अखिल अघ भागा। बन उपबन बापिका तड़ागा।।

छन्द-बापीं तड़ाग अनूप कूप मनोहरायत सोहहीं।

                                        

सोपान सुन्दर नीर निर्मल देखि सुर मुनि मोहहीं।।

बहु रंग कंज अनेक खग कूजहिं मधुप गुंजारहीं।

आराम रम्य पिकादि खग रव जनु पथिक हंकारहीं।।

दोहा-रमानाथ जहँ राजा सो पुर बरनि कि जाइ।

अनिमादिक सुख संपदा रहीं अवध सब छाइ।।29।।

जहँ तहँ नर रघुपति गुन गावहिं। बैठि परस्पर इहइ सिखावहि।।

भजहु प्रनत प्रतिपालक रामहि। सोभा सील रूप गुन दामहि।।

जलज बिलोचन स्यामल गातहि। पलक नयन इव सेवक त्रातहि।।

धृत सर रुचिर चाप तूनीरहि। संत कंज बन रबि रनधीरहि।।

काल कराल ब्याल खगराजहि। नमत राम अकाम ममता जहि।।

लोभ मोह मृगजूथ किरातहि। मन सिजकरि हरिजन सुखदातहि।।

संसय सोक निबिड़ तम भानुहि। दनुज गहन घन दहन कृसानुहि।।

जनकसुतासमेत रघुबीरहि। कस न भजहु भंजन भव भीरहि।।

बहु बासना मसक हिम रासिहि। सदा एकरस अज अबिनासिहि।।

मुनि रंजन भंजन महि भारहिं। तुलसीदास के प्रभुहि उदारहि।।

दोहा- एहि बिधि नगर नाहि नर करहिं राम गुनगान।

                                        

सानुकूल सब पर रहहिं संतत कृपानिधान।।30।।

जब ते राम प्रताप खगेसा। उदित भयउ अति प्रबल दिनेसा।।

पूरि प्रकास रहेउ तिहुँ लोका। बहुतेन्ह सुख बहुतन मन सोका।।

जिन्हहि सोक ते करउँ बखानी। प्रथम अबिद्या निसा नसानी।।

अघ उलूक जहँ तहाँ लुकाने। काम क्रोध कैरव सकुचाने।।

बिबिध कर्म गुन काल सुभाऊ। ए चकोर सुख लहहिं न काऊ।।

मत्सर मान मोह मद चोरा। इन्ह कर हुनर न कवनिहुँ ओरा।।

धरम तड़ाग ग्यान बिग्याना। ए पंकज बिकसे बिधि नान।।

सुख संतोष बिराग बिबेका। बिगत सोक ए कोक अनेका।।

दोहा-  यह प्रताप रबि जाकें उर जग करइ प्रकास।

पछिले बाढ़हिं प्रथम जे कहे ते पावहिं नास।।31।।

भ्रातन्ह सहित रामु एक बारा। संग परम प्रिय पवनकुमारा।।

सुन्दर उपबन देखन गए। सब तरु कुसुमित पल्लव नए।।

जानि समय सनकादिक आए। तेज पुंज गुन सील सुहाए।।

ब्रह्मानन्द सदा लयलीना। देखत बालक बहुकालीना।।

                                        

रूप धरें जनु चारिउ बेदा। समदरसी मुनि बिगत बिभेदा।।

आसा बसन ब्यसन यह तिन्हहीं। रघुपति चरित होइ तहँ सुनहीं।।

तहाँ रहे सनकादि भवानी। जहँ घटसंभव मुनिबर ग्यानी।।

राम कथा मुनिबर बहु बरनी। ग्यान जोनि पावक जिमि अरनी।।

दोहा-तेखि राम मुनि आवत हरषि दंडवत कीन्ह।

स्वागत पूँछि पीत पट प्रभु बैठन्ह कहँ दीन्ह।।32।।

कीन्ह दंडवत तीनिउँ भाई। सहित पवनसुत सुख अधिकाई।

मुनि रघुपति छबि अतुल बिलोकी। भए मगन मन सके न रोकी।।

स्यामल गात सोरुह लोचन। सुन्दरता मंदिर भव मोचन।।

एकटक रहे निमेष न लावहिं। प्रभु कर जोरें सीस नवावहिं।।

तिन्ह कै दसा देखि रघुबीरा। स्रवत नयन जल पुलक सरीरा।।

कर गहि प्रभु मुनिबर बैठारे। परम मनोहर बचन उचारे।।

आजु धन्य मैं सुनहु मुनीसा। तुम्हरें दरस जाहिं अघ खीसा।।

बड़े भाग पाइव सतसंगा। बिनहिं प्रयास सोहिं भव भंगा।।

                                        

दोहा-संत संग अपबर्ग कर कामी भव कर पंथ।

कहहिं संत कबि कोबिद श्रुति पुरान सदग्रंथ।।33।।

सुनि प्रभु बचन हरषि मुनिचारी। पुलकित तन अस्तुति अनुसारी।।

जय भगवंत अनंत अनामय। अनघ अनेक एक करुनामय।।

जय निर्गुन जय जय गुन सागर। सुख मंदिर सुन्दर अति नागर।।

जय इंदिरा रमन जय भूधर। अनुपम अज अनादि सोभाकर।।

ग्यान निधान अमान मानप्रद। पावन सुजस पुरान बेद बद।।

तग्य कृतग्य अग्यता भंजन। नाम अनेक अनाम निरंजन।।

सर्ब सर्बगत स्रब उरालय। बससि सदा हम कहुँ परिपालय।।

द्वंद बिपति भव फंद बिभंजय। हृदि बसि राम काम मद गंजय।।

दोहा-परमानंद कृपायतन मन परिपूरन काम।

प्रेम भगति अनपायनी देहु हमहिं श्रीराम।।34।।

देहु भगति रघुपति अति पावनि। त्रिविध ताप भव दापनसावनि।।

प्रनत काम सुरधेनु कलपतरु। होइ प्रसन्न दीजै प्रभु यह बरु।।

भव बारिधि कुंभज रघुनायक। सेवत सुलभ सकल सुखदायक।।

मन संभव दारुन दुख दारय। दीनबंधु समता बिस्तारय।।

आस त्रास इरिषादि निवारक। विनेय विवेक बिरति बिस्तारक।।

                                        

भूप मौलि मनि मंडन धरनी। देहि भगति संसृति सरि तरनी।।

मुनि मन मानस हंस निरंतर। चरन कमल बंदित अज संकर।

रघुकुल केतु सेतु श्रुति रच्छक। काल करम सुभाउ गुन भच्छक।।

तारन तरन हरन सब दूषन। तुलसिदासप्रभु त्रिभुवन भूषन।।

दोहा-बार बार अस्तुति करि प्रेम सहित सिरु नाइ।

ब्रह्म भवन सनकादि गे अति अभीष्ट बर पाइ।।

सनकादिक बिधि लोक सिधाए। भ्रातन्ह राम चरन सिरु नाए।।

पूछत प्रभुहि सकल सकुचाहीं। चितवहिं सब मारुत सुत पाहीं।।

सुनी चहहिं प्रभु मुख कै बानी। जो सुनि होइ सकल भ्रम हानी।।

अंतरजामी प्रभु सभ जाना। बूझत कहहु काह हनुमाना।।

जोरि पानि कह तब हनुमंता। सुनहु दीनदयाल भगवंता।।

नाथ भरत कछु पूँछन चहहीं। प्रस्न करत मन संकुचत अहहीं।।

तुम्ह जानहु कपि मोर सुभाऊ। भरतहि मोहि कछु अंतर काऊ।।

सुनि प्रभु बचन भरत गहे चरना। सुनहु नाथ प्रनतारति हरना।।

                                        

दोहा- नाथ न मोहि संदेह कछु सपनेहुँ नोक न मोह।

केवल कृपा तुम्हारिहि कृपानंद संदोह।।36।।

करउ कृपानिधि एक ढिठाई। मैं सेवक तुम्ह जन सुखदाई।।

संतन्ह कै महिमा रघुराई। बहु बिधि बेद पुरानन्ह गाई।।

श्रीमुख तुम्ह पुनि कीन्ह बड़ाइ। तिन्ह पर प्रभुहि प्रीति अधिकाई।।

सुना चहउँ प्रभु तिन्ह कर लच्छन। कृपासिंधु गुन ग्यान विचच्छन।।

संत असंत भेद बिलगाई। प्रनतपाल मोहि कहहु बुझाई।।

संतन्ह के लच्छन सुनु भ्राता। अगनित श्रुति पुरानविख्याता।।

संत असंतन्हि कै असि करनी। जिमि कुठार चंदन आचरनी।।

काटइ परसु मलय सुनु भाई। निज गुन देइ सुगंध बसाई।।

दोहा-ताते सुर सीसन्ह चढ़त जग बल्लभ श्रीखंड।

अनल दाहि पीटत घनहिं परसु बदन यह दंड।।37।।

विषय अलंपट सील गुनाकर। पर दुख दुख सुखसुख देखे पर।

सम अभूतरिपु बिमद बिरागी। लोभामरष हरष भय त्यागी।।

कोमलचित दीनन्ह पर दाया। मन बच क्रम मम भगति अमाया।।

सबहि मानप्रद आपु अमानी। भरत प्रान सम मम ते प्रानी।।

                                        

बिगत काम मम नाम परायन। सांति बिरति बिनती मुदितायन।।

सीतलता सरलता मयत्री। द्विच पद प्रीति धर्म जनयत्री।।

ए सब लच्छन बसहिं जासु उर। जानेहु तात संत संतत फुर।।

सम दम नियम नीति नहिं डोलहिं। परुष बचन कबहूँ नहिं बोलहिं।।

दोहा-निंदा अस्तुति उभय सम ममता मम पद कंज।

ते सज्जन मम प्रानप्रिय गुन मंदिर सुख पुंज।।38।।

सुनहु असंतन्ह केर सुभाऊ। भूलेहुँ संगति करिअ न काऊ।।

तिन्ह कर संग सदा दुखदाई। जिमि कपिलहि घालइ हरहाई।।

खलन्ह हृदयँ अति ताप बिसेषी। जरहिं सदा पर संपति देखी।।

जहँ कहुँ निंदा सुनहिं पराई। हरषहिं मनहुँ परी निधि पाई।।

काम क्रोध मद लोभ परायन। निर्दय कपटी कुटिल मलायन।।

बयरु अकारन सब काहू सों। जो कर हित अनहित ताहू सों।।

झूठइ लेना झूठइ देना। झूठइ भोजन झूठ चबेना।।

                                        

बोलहिं मधुर बचन जिमि मोरा। खाइ महा अहि हृदय कठोरा।।

दोहा-पर द्रोही पर दार रत पर धन पर अपबाद।

ते नर पाँवर पापमय देह धरें मनुजाद।।39।।

लोभइ ओढ़न लोभइ डासन। सिस्नोदर पर जमपुर त्रास न।।

काहू की जौं सुनहिं बड़ाई। स्वास लेहिं जनु जूड़ी आई।।

जब काहू कै देखहिं बिपती। सुखी भए मानहुँ जग नृपती।।

स्वारथ रत परिवार बिरोधी। लंपट काम लोभ अति क्रोधी।।

मातु पिता गुर बिप्र न मानहिं। आपु गए अरु घालहिं आनहिं।।

करहिं मोह बस द्रोह परावा। संत संग हरि कथा न भावा।।

अवगुन सिंधु मंदमति कामी। बेद बिदूषक परधन स्वामी।।

बिप्र द्रोह पर द्रोह बिसेषा। दंभ कपट जियँ धरें सुबेषा।।

दोहा-एसे अधम मनुज खल कृतजुग त्रेताँ नाहिं।

द्वापर कछुक बृंद बहु होइहहिं कलिजुग माहिं।।40।।

पर हित सरिस धर्म नहिं भाई। पर पीड़ा सम नहिं अधमाई।।

निर्नय सकल पुरान बेद कर। कहेउँ तात जानहिं कोबिद नर।।

नर सरीर धरि जे पर पीरा। करहिं ते सहहिं महा भव भीरा।।

करहिं मोह बस नर अघ नाना। स्वारथ रत परलोक नसाना।।

                                        

कालरूप तिन्ह कहँ मैं भ्राता। सुभ अरु असुभ कर्म फल दाता।।

अस बिचारि जे परम सयाने। भजहिं मोहि संसृत दुख जाने।।

त्यागहिं कर्म सुभासुभ दायक। भजहिं मोहि सुरनर मुनि नायक।।

संत असंतन्ह के गुन भाषे। ते न परहिं भव जिन्ह लखि राखे।।

दोहा-सुनहु तात माया कृत गुन अरु दोष अनेक।

गुन यह उबय न देखिअहिं देखिअ सो अबिबेक।।41।।

श्रीमुख बचन सुनत mब भाई। हरषे प्रेम न हृदयँ समाई।।

करहिं बिनय अति बारहिं बारा। हनूमान हियँ हरष अपारा।।

पुनि रघुपति निज मंदिर गए। एहि बिधि चरित करत नित नए।।

बार बार नारद मुनि आवहिं। चरित पुनीत राम के गावहिं।।

नित नव चरित देकि मुनि जाहीं। ब्रह्मलोक सब कथा कहाहीं।।

सुनि बिरंचि अतिसय सुख मानहिं। पुनि पुनि तात करहु गुन गानहिं।।

सनकादिक नारदहि सराहहिं। जद्यपि ब्रह्म निरत मुनि आहहिं।।

सुनि गुन गान समाधि बिसारी। सादर सुनहिं परम अधिकारी।।

                                        

दोहा- जीवनमुक्त ब्रह्मपर चरित सुनहिं तजि ध्यान।

जे हरि कथाँ नकरहिं रति तिन्ह के हिय पाषान।।42।।

एक बार रघुनाथ बोलाए। गुर द्विज पुरबासी सब आए।।

बैठे गुर मुनि अरु द्विज सज्जन। बोले बचन भगत भव भंजन।।

सुनहु सकल पुरजन मम बानी। कहउँ न कछु ममता उर आनी।।

नहिं अनीति नहिं कछु प्रभुताई। सुनहु करहु जो तुम्हहि सोहाई।।

सोइ सेवक प्रियतम मम सोई। मम अनुसासन मानै जोई।।

जौं अनीति कछु भाषौं भाई। तौ मोहि बरजहु भय बिसराई।।

बड़े भाग मानुष तनु पावा। सुर दुर्लभ सब ग्रंथन्हि गावा।।

साधन धाम मोच्छ कर द्वार। पाइ न जेहिं परलोक सँवारा।।

दोहा-सो परत्र दुख पावइ सिर धुनि धुनि पछिताइ।

कालहि कर्महि ईस्वरहि मिथ्या दोष लगाइ।।43।।

एहि तन कर फल बिषय न भाई। स्वर्गउ स्वल्प अंत दुखदाई।।

नर तनु पाइ बिषयँ मन देहीं। पलटि सुधा ते सठ बिष लेहीं।।

ताहि कबदुँ भल कहइ न कोई। गुंजा ग्रहइ परस मनि खोई।।

आकर चारि लच्छ चौरासी। जोनि भ्रमत यह जिव अबिनासी।।

फिरत सदा माया कर प्रेरा। काल कर्म सुभाव गुन घेरा।।

कबहुँक करि करुना नर देही। देत ईस बिनु हेतु सनेही।।

                                        

नर तनु भव बारिधि कहुँ बेरो। सन्मुख मरुत अनुग्रह मेरो।।

करनधार सदगुर दृढ़ नावा। दुर्लभ साज सुलभ करि पावा।।

दोहा-जो न तरै भव सागर नर समाज अस पाइ।

सो कृत निंदक मंदमति आत्माहन गति जाइ।।44।।

जौं परलोक इहाँ सुख चहहू। सुनि मम बचन हृदयँ दृढ़ गहहू।।

सुलभ सुखद मारग यह भाई। भगति मोहि पुरान श्रुति गाई।।

ग्यान अगम प्रत्यूह अनेका। साधन कठिन न मन कहुँ टेका।।

करत कष्ट बहु पावइ कोऊ। भक्ति हीन मोहि प्रिय नहिं सोऊ।।

भक्ति सुतंत्र सकल सुख खानी। बिनु सतसंग न पावहिं प्रानी।।

पुन्य पुंज बिनु मिलहिं न संता। सतसंगति संसृति कर अंता।।

पुन्य एक जग महुँ नहिं दूजा। मन क्रम बचन बिप्र पद पूजा।।

सानुकूल तेहि पर मुनि देवा। जो तजि कपटु करइ द्विज सेवा।।

दोहा-औरउ एक गुपुत मत सबहि कहउँ कर जोरि।

संकर भजन बिना नर भगति न पावइ मोरि।।45।।

कहहु भगति पथ कवन प्रयासा। जोग न मख जप ताप उपवासा।।

                                        

सरल सुभाव न मन कुटिलाई। जथा लाभ संतोष सदाई।।

मोर दास कहाइ नर आसा। करइ तौ कहहु कहा बिस्वासा।।

बहुत कहउँ का कथा बढ़ाई। एहि आचरन बस्य मैं भाई।।

बैर न बिग्रह आस न त्रासा। सुखमय ताहि सदा सब आसा।।

अनारंभ अनिकेत अमानी। अनघ अरोष दच्छ बिग्यानी।।

प्रीति सदा सज्जन संसर्गा। तृन सम बिषय स्वर्ग अपबर्गा।।

भगति पच्छ हठ नहिं सठताई। दुष्ट तर्क सब दूरि बहाई।।

दोहा-मम गुन ग्राम नाम रत गत ममता मद मोह।

ता कर सुख सोइ जानइ परानंद संदोह।।46।।

सुनत सुधासम बचन राम के। गहे सबनि पद कृपाधाम के।।

जननि जनक गुर बंधु हमारे। कृपा निधान प्रान ते प्यारे।।

तनु धनु धाम राम हितकारी। सब बिधि तुम्ह प्रनतारति हारी।।

असि सिख तुम्ह बिनु देइ न कोउ। मातु पिता स्वारथ रत ओऊ।।

हेतु रहित जग जुग उपकारी। तुम्ह तुम्हार सेवक असुरारी।।

स्वारथ मीत सकल जग माहीं। सपनेहुँ प्रभु परमारथ नाहीं।।

                                        

सब के बचन प्रेम रस साने। सुनि रघुनाथ हृदयँ हरषाने।।

निज निज गृह गए आयसु पाई। बरनत प्रभु बतकही सुहाई।।

दोहा-उमा अवधबासी नर नारि कृतारथ रूप।

ब्रह्म सच्चिदानंद घन रघुनायक जहँ भूप।।47।।

एक बार बसिष्ट मुनि आए। जहाँ राम सुखधाम सुहाए।।

अति आदर रघुनायक कीन्हा। पद पखारि पादोदक लीन्हा।।

राम सुनहु मुनि कह कर जोरी। कृपासिंधु बिनती कछु मोरी।।

देखि देखि आचरन तुम्हारा। होत मोह मम हृदयँ अपारा।।

महिमा अमिति बेद नहिं जाना। मैं केहि भाँति कहउँ भगवाना।।

उपरोहित्य कर्म अति मंदा। बेद पुरान सुमृति कर निंदा।।

जब न लेउँ मैं तब बिधि मोही। कहा लाभ आगें सुत तोही।।

परमातमा ब्रह्म नर रूपा। होइहि रघुकुल भूषन भूपा।।

दोहा-तब मैं हृदयँ बिचारा जोग जग्य ब्रत दान।

जा कहुँ करिअ सो पैहउँ धर्म न एहि सम आन।।48।।

जप तप नियम जोग निज धर्मा। श्रुति संभव नाना सुभ कर्मा।।

                                        

ग्यान दया दम तीरथ मज्जन। जहँ लगि धर्म कहत श्रुति सज्जन।।

आगम निगम पुरान अनेका। पढ़े सुने कर फल प्रभु एका।।

तब पद पंकज प्रीति निरंतर। सब साधन कर यह फल सुंदर।।

छूटइ मल कि मलहि के धोएँ। घृत कि पाव कोई बारि बिलोएँ।।

प्रेम भगति जल बिनु रघुराई। अभिअंतर मल कबहुँ न जाई।।

सोइ सर्बग्य तग्य सोइ पंडित। सोइ गुन गृह बिग्यान अखंडित।।

दच्छ सकल लच्छन जुत सोई। जाकें पद सरोज रति होई।।

दोहा-नाथ एक बर मागउँ राम कपा करि देहु।

जन्म जन्म प्रभु पद कमल कबहुँ घटै जनि नेहु।।49।।

अस कहि मुनि बसिष्ट गृह आए। कृपासिंधु के मन अति भाए।।

हनूमान भरतादिक भ्राता। संग लिए सेवक सुखदाता।।

पुनि कृपाल पुर बाहेर गए। गज रथ तुरग मगावत भए।।

देखि कृपा करि सकल सराहे। दिए उचित जिन्ह जिन्ह तेइ चाहे।।

हरन सकल श्रम प्रभु श्रम पाई। गए जहाँ सीतल अवँराई।।

भरत दीन्ह निज बसन डसाई। बैठे प्रभु सेवहिं सब भाई।।

                                        

मारुतसुत तब मारुत करई। पुलक बपुष लोचन जल भरई।।

हनूमान सम नहिं बड़भागी। नहिं कोउ राम चरन अनुरागी।।

गिरिजा जासु प्रीति सेवकाई। बार बार प्रभु निज मुख गाई।।

दोहा-तेहिं अवसर मुनि नारद आए करतल बीन।

गावन लगे राम कल कीरति सदा नबीन।।50।।

मामवलोकय पंकज लोचन। कृपा बिलोकनि सोच बिमोचन।।

नील तामरस स्याम काम अरि। हृदय कंज मकरंद मधुप हरि।।

जातुधान बरूथ बल भंजन। मुनि सज्जन रंजन अघ गंजन।।

भूसुर ससि नव बृंद बलाहक। असरन सरन दीन जन गाहक।।

भुज बल बिपुल भार महि खंडित। खर दूषन बिराध बध पंडित।।

रावनारि सुखरूप भूपबर। जय दसरथ कुल कुमुद सुधाकर।।

सुजस पुरान बिदित निकमागम। गावत सुर मुनि संत समागम।।

कारुनीक ब्यलीक मद खंडन। सब बिधि कुसल कोसला मंडन।।

कलि मल मथन नाम ममताहन। तुलसिदास प्रभु पाहि प्रनत जन।।

दोहा-प्रेम सहित मुनि नारद बरनि राम गुन ग्राम।

सोभासिंधु हृदयँ धरि गए जहाँ बिधि धाम।।51।।

गिरिजा सुनहु बिसद यह कथा। मैं सब कही मोरि मति जथा।।

                                        

राम चरित सत कोटि अपारा। श्रुति सारदा न बरनै पारा।।

राम अनंत अनंत गुनानी। जन्म कर्म अनंत नामानी।।

जल सीकर महि रज गनि जाहीं। रघुपति चरित न बरनि सिराहीं।।

बिमल कथा हरि पद दायनी। भगति होइ सुनि अनपायनी।।

उमा कहिउँ सब कथा सुहाई। जो भुसुंडि खगपतिहि सुनाई।।

कछुक राम गुन करेउँ बखानी। अब का कहौं सो कहहु भवानी।।

सुनि सुभ कथा उमा हरषानी। बोली अति बिनीत मृदु बानी।।

धन्य धन्य मैं धन्य पुरारी। सुनेउँ राम गुन भव भय हारी।।

दोहा-तुम्हरी कृपाँ कपायतन अब कृतकृत्य न मोह।

जानेउँ राम प्रताप प्रभु चिदानंद संदोह।।52क।।

नाथ तवानन ससि स्रवत कथा सुधा रघुबीर।

श्रवन पुटन्हि मन पान करि नहिं अघात मतिधीर।।52ख।।

राम चरित जे सुनत अघाहीं। रस बिसेष जाना तिन्ह नाहीं।।

                                        

जीवन्मुक्त महामुनि जेऊ। हरि गुन सुनहिं निरंतर तेऊ।।

भव सागर चह पार जो पावा। राम कथा ता कहँ दृढ़ नावा।।

बिषइन्ह कहँ पुनि हरि गुन ग्रामा। श्रवन सुखद अरु मन अभिरामा।।

श्रवनवंत अस को जग माहीं। जाहि न रघुपति चरित सोहाहीं।।

ते जड़ जीव निजात्मक घाती। जिन्हहि न रघुपति कथा सोहाती।।

हरिचरित्र मानस तुम्ह गावा। सुनि मैं नाथ अमिति सुख पावा।।

तुम्ह जो कही यह कथा सुहाई। कागभसुंडि गरुड़ प्रति गाई।।

दोहा-बिरति ग्यान बिग्यान दृढ़ राम चरन अति नेह।

बायस तन रघुपति भगति मोहि परम संदेह।।53।।

नर सहस्र महँ सुनहु पुरारी। कोउ एक होइ धर्म ब्रतधारी।।

धर्मसील कोटिक महँ कोई। बिषय बिमुख बिराग रत होई।।

कोटि विरक्त मध्य श्रुति कहई। सम्यक ग्यान सकृत कोउ लहई।।

ग्यानवंत कोटिक महँ कोउ। जीवनमुक्त सकृत जग सोऊ।।

तिन्ह सहस्र महुँ सब सुख खानी। दुर्लभ ब्रह्मलीन बिग्यानी।।

धर्मसील बिरक्त अरु ग्यानी। जीवनमुक्त ब्रह्मपर प्रानी।।

सब ते सो दुर्लभ सुरराया। राम भगति रत गत मद माया।।

सो हरि भगति काग किमि पाई। बिस्वनाथ मोहि कहहु बुझाई।।

दोहा-राम परायन ग्यान रत गुनागार मति धीर।

नाथ कहहु केहि कारन पायउ काक सरीर।।54।।

यह प्रभु चरित पवित्र सुहावा। कहहु कृपाल काग कहँ पावा।।

                                        

तुम्ह केहि भाँति सुना मदनारी। कहहु मोहि अति कौतुक भारी।।

गरुड़ महाग्यानी गुन रासी। हरि सेवक अति निकट निवासी।।

तेहिं केहि हेतु काग सन जाई। सुनी कथा मुनि निकर बिहाई।।

कहहु कवन बिधि भा संबादा। दोउ हरिभगत काग उरगादा।।

गौरि गिरा सुनि सरल सुहाई। बोले सिव सादर सुख पाई।।

धन्य सती पावन मति तोरी। रघुपति चरन प्रीति नहिं थोरी।।

सुनहु परम पुनीत इतिहासा। जो सुनि सकल लोक भ्रम नासा।।

उपजइ राम चरन बिस्वासा। भव निधि तर नर बिनहिं प्रयासा।।

दोहा-ऐसिअ प्रस्न बिहंगपति कीन्हि काग सन जाइ।

सो सब सादर कहिहउँ सुनहु उमा मन लाइ।।55।।

मैं जिमि कथा सुनी भव मोचनि। सो प्रसंग सुनि सुमुखि सुलोचनि।।

प्रथम दच्छ गृह तव अवतारा। सती नाम तब रहा तुम्हारा।।

दच्छ जग्य तब भा अपमाना। तुम्ह अति क्रोध तजे तब प्राना।।

मम अनुचरन्ह कीन्ह मख भंगा। जानहु तुम्ह सो सकल प्रसंगा।।

                                        

तब अति सोच भयउ मन मोरें। दुखी भयउँ बियोग प्रिय तोरें।।

सुंदर बन गिरि सरित तड़ागा। कौतुक देखत फिरउँ बेरागा।।

गिरि सुमेर उत्तर दिसि दूरी। नील सैल एक सुंदर भूरी।।

तासु कनकमय सिखर सुहाए। चारि चारु मोरे मन भाए।।

तिन्ह पर एक एक बिटप बिसाला। बट पीपर पाकरी रसाला।।

सैलोपरि सर सुंदर सोहा। मनि सोपान देखि मन मोहा।।

दोहा-सीतल अमल मधुर जल जलज बिपुल बहुरंग।

कूजत कल रव हंस गन गुंजत मंजुल भृंग।।56।।

तिहं गिरि रुचिर बसइ खग सोई। तासु नास कल्पांत न होई।।

माया कृत गुन दोष अनेका। मोह मनोज आदि अबिबेका।।

रहे ब्यापि समस्त जग माहीं। तेहि गिरि निकट कबहुँ नहिं जाहीं।।

तहँ बसि हरिहि भजइ जिमि कागा। सो सुनु उमा सहित अनुरागा।।

पीपर तरु तर ध्यान सो धरई। जाप जग्य पाकरि तर करई।।

आँब छाँह कर मानस पूजा। तजि हरि भजनु काजु नहिं दूजा।।

बर तर कह हरि कथा प्रसंगा। आवहिं सुनहिं अनेक बिहंगा।।

                                        

राम चरित बिचित्र बिधि नाना। प्रेम सहित कर सादर गाना।।

सुनहिं सकल मति बिमल मराला। बसहिं निरंतर जे तेहिं ताला।।

जब मैं जाइ सो कौतुक देखा। उर उपजा आनंद बिसेषा।।

दोहा-तब कछु काल मराल तनु धरि तहँ कीन्ह निवास।

सादर सुनि रघुपति गुन पुनि आयउँ कैलास।।57।।

गिरिजा कहेउँ सो सब इतिहासा। मैं जिहि समय गयउँ खग पासा।।

अब सो कथा सुनहु जेहि हेतू। गयउ काग पहिं खग कुल केतू।।

जब रघुनाथ कीन्हि रन क्रीड़ा। समुझत चरित होति मोहि ब्रीड़ा।।

इंद्रजीत कर आपु बँधायो। तब नारद मुनि गरुड़ पठायो।।

बंधन काटि गयो उरगादा। उपजा हृदयँ प्रचंड बिषादा।।

प्रभु बंधन समुझत बहु भाँती। करत बिचार उरग आरती।।

ब्यापक ब्रह्म बिरज बागीसा। माया मोह पार परमीसा।।

सो अवतार सुनेउँ जग माहीं। देखेउँ सो प्रभाव कछु नाहीं।।

दोहा-भव बंधन ते छूटहिं नर जापि जा कर नाम।

खर्ब निसाचर बाँधेउ नागपास सोइ राम।।58।।

                                        

नाना भाँति मनहि समुझावा। प्रगट न ग्यान हृदयँ भ्रम छावा।।

खेद खिन्न मन तर्क बढ़ाई। भयउ मोहबस तुम्हरिहं नाई।।

ब्याकुल गयउ देवरिषि पाहीं। कहेसि जो संसय निज मन माहीं।।

सुनि नारदहि लागि अति दाया। सुनु खग प्रबल राम कै माया।।

जो ग्यानिन्ह कर चित अपहरई। बरिआईं बिमोह मन करई।।

जेहिं बहु बार नचावा मोही। सोइ ब्यापी बिहंगपति तोही।।

महामोह उपजा उर तोरें। मिटिहि न बेगि कहें खग मोरें।।

चतुरानन पहिं जाहु खगेसा। सोइ करेहु जेहि होइ निदेसा।।

दोहा-अस कहि चले देवरिषि करत राम गुन गान।

हरि माया बल बरनत पुनि पुनि परम सुजान।।59।।

तब खगपति बिरंचि पहिं गयऊ। निज संदेह सुनावत भयऊ।।

सुनि बिरंचि रामहि सिरु नावा। समुझि प्रताप प्रेम अति छावा।।

मन महुँ करइ बिचार बिधाता। माया बस कबि कोबिद ग्याता।।

हरि माया कर अमिति प्रभावा। बिपुल बार जोहिं मोहि नचावा।।

अग जगमय जग मम उपराजा। नहिं आचरज मोह खगराजा।।

तब बोले बिधि गिरा सुहाई। जान महेस राम प्रभुताई।।

                                        

बैनतेय संकर पहिं जाहू। तात अनत पूछहु जनि काहू।।

तहँ होइहि तव संसय हानी। चलेउ बिहंग सुनत बिधि बानी।।

दोहा-परमातुर बिहंगपति आयउ तब मो पास।

जात रहेउँ कुबेर गृह रहिहु उमा कैलास।।60।।

तेहिं मम पद सादर सिरु नावा। पुनि आपन संदेह सुनावा।।

सुनि ता करि बिनती मृदु बानी। प्रेम सहित मैं कहेउँ भवानी।।

मिलेहु गरुड़ मारग महँ मोही। कवन भाँति समुझावौं तोही।।

तबहिं होइ सब संसय भंगा। जब बहु काल करिअ सतसंगा।।

सुनिअ तहाँ हरि कथा सुहाई। नाना भाँति मुनिन्ह जोगाई।।

जोहि महुँ आदि मध्य अवसाना। प्रभु प्रतिपाद्य राम भगवाना।।

नित हरि कथा होत जहँ भाई। पठवउँ तहाँ सुनहु तुम्ह जाई।।

जाइहि सुनत सकल संदेहा। राम चरन होइहि अति नेहा।।

दोहा-बिनु सतसंग न हरि कथा तेहि बिनु मोह न भाग।

मोह गएँ बिनु राम पद होइ न दृढ़ अनुराग।।61।।

                                        

मिलहिं न रघुपति बिनु अनुरागा। किएँ जोग तप ग्यान बिरागा।।

उत्तर दिसि सुंदर गिरि नीला। तहँ रह काकभुसुंडि सुसीला।।

राम भगति पथ परम प्रबीना। ग्यानी गुन गृह बहु कालीना।।

राम कथा सो कहइ निरंतर। सादर सुनहिं बिबिध बिहंगबर।।

जाइ सुनहु तहँ हरि गुन भूरी। होइहि मोह जनित दुख दूरी।।

मैं जब तेहि सब कहा बुझाई। चलेउ हरषि मम पद सिरु नाई।।

ताते उमा न मैं समुझावा। रघुपति कृपाँ मरमु मैं पावा।।

होइहि कीन्ह कबहुँ अभिमाना। सो खोवै चह कृपानिधाना।।

कछु तेहि ते पुनि मैं नहिं राखा। समुझइ खग खगही कै भाषा।।

प्रभु माया बलवंत भवानी। जाहि न मोह कवन अस ग्यानी।।

दोहा-ग्यानी भगत सिरोमनि त्रिभुवनपति कर जान।

ताहि मोह माया नर पावँर करहिं गुमान।।62क।।

सिव बिरंचि कहुँ मोहइ को है बपुरा आन।

अस जियँ जानि भजहिं मुनि माया पति भगवान।।62ख।।

गयउ गरुड़ जहँ बसइ भुसुंड़ा। मति अकुंठ हरि भगति अखंडा।।

                                        

देखि सैल प्रसन्न मन भयऊ। माया मोह सोच सब गयऊ।।

करि तड़ाग मज्जन जलपाना। बट तर गयउ हृदयँ हरषाना।।

बृद्ध बृद्ध बिहंग तहँ आए। सुनै राम के चरित सुहाए।।

कथा अरंभ करै सोइ चाहा। तेहि समय गयउ खगनाहा।।

आवत देखि सकल खगराजा। हरषेउ बायस सहित समाजा।।

अति आदर खगपिति कर कीन्हा। स्वागत पूछि सुआसन दीन्हा।।

करि पूजा समेत अनुरागा। मधुर बचन तब बोलेउ कागा।।

दोहा-नाथ कृतारथ भयउँ मैं तव दरसन खगराज।

आयसु देहु सो करौं अब प्रभु आयहु केहि काज।।63क।।

सदा कृतारथ रूप तुम्ह कह मृदु बचन खगेस।

जेहि का अस्तुति सादर निज मुख कीन्हि महेस।।63ख।।

सुनहु तात जेहि कारन आयउँ। सो सब भयउ दरस तव पायउँ।।

देखि परम पावन तव आश्रम। गयउ मोह संसय नाना भ्रम।।

अब श्रीराम कथा अति पावनि। सदा सुखद दुख पुंज नसावनि।।

सादर तात सुनावहु मोहि। बार बार बिनवउँ प्रभु तोही।।

सुनत गरुड़ कै गिरा बिनीता। सरल सुप्रेम सुखद सुपुनीता।।

                                        

भयउ तासु मन परम उछाहा। लाग कहै रघुपति गुन गाहा।।

प्रथमहिं अति अनुराग भवानी। रामचरित सर कहेसि बखानी।।

पुनि नारद कर मोह अपारा। कहेसि बहुरि रावन अवतारा।।

प्रभु अवतार कथा पुनि गाई। तब सिसु चरित कहेसि मन लाई।।

दोहा-बालचरित कहि बिबिधि बिधि मन महं परम उछाह।

रिषि आगवन कहेसि पुनि श्रीरघुबीर बिबाह।।64।।

बहुरि राम अभिषेक प्रसंगा। पुनि नृप बचन राज रस भंगा।।

पुरबासिन्ह कर बिरह बिषादा। कहेसि राम लछिमन संबादा।।

बिपिन गवन केवट अनुरागा। सुरसरि उतरि निवास प्रयागा।।

बालमीक प्रभु मिलन बखाना। चित्रकूट जिमि बसे भगवाना।।

सचिवागवन नगर नृप मरना। भरतागवन प्रेम बहु बरना।।

करि नृप क्रिया संग पुरबासी। भरत गए जहँ प्रभु सुख रासी।।

पुनि रघुपति बहुबिधि समुझाए। लै पादुका अवधपुर आए।।

भरत रहनि सुरपति सुत करनी। प्रभु अरु अत्रि भेंट पुनि बरनी।।

                                        

दोहा-कहि बिराध बध जेहि बिधि देह तजी सरभंग।

बरनि सुतीछन प्रीति पुनि प्रभु अगस्ति सतसंग।।65।।

कहि दंडक बन पावनताई। गीध मइत्री पुनि तेहिं गाई।।

पुनि प्रभु पंचबटीं कृत बासा। भंजी सकल मुनिन्ह की त्रासा।।

पुनि लछिमन उपदेस अनूपा। सूपनखा जिमि कीन्ह कुरूपा।।

खर दूषन बध बहुरि बखाना। जिमि सब मरमु दसानन जाना।।

दसकंधर मारीच बतकही। जेहि बिधि भई सो सब तेहिं कहि।।

पुनि माया सीता कर हरना। श्रीरघुबीर बिरह कछु बरना।।

पुनि प्रभु गीध क्रिया जिमि कीन्ही। बधि कबंध सबरिहि गति दीन्ही।।

बहुरि बिरह बरनत रघुबीरा। जेहि बिधि गए सरोबर तीरा।।

दोहा-प्रभु नारद संबाद कहि मारुति मिलन प्रसंग।

पुनि सुग्रीव मिताई बालि प्रान कर भंग।।66क।।

कपिहि तिलक करि प्रभु कृत सैल प्रबरषन बास।

बरनन बर्षा सरद अरु राम रोष कपि त्रास।।66ख।।

जेहि बिधि कपिपति कीस पठाए। सीता खोज सकल दिसि धाए।।

                                        

बिबिर प्रबेस कीन्ह जेहि भाँती। कपिन्ह बहोरि मिला संपाती।।

सुनि सब कथा समीर कुमारा। नाघत भयउ पोयधि अपारा।।

लंकाँ कपु प्रबेस जिमि कीन्हा। पुनि सीतहि धीरजु जिमि दीन्हा।।

बन उजारि रावनहि प्रबोधी। पुर दहि नाघेउ बहुरि पयोधी।।

आए कपि सब जहँ रघुराई। बैदेही की कुसल सुनाई।।

सेन समेति जथा रघुबीरा। उतरे जाइ बारिनिधि तीरा।।

मिला बिभीषन जेहि बिधि अई। सागर निग्रह कथा सुनाई।।

दोहा-सेतु बाँधि कपि सेन जिमि उतरी सागर पार।

गयउ बसीठी बीरबर जेहि बिधि बालिकुमार।।67क।।

निसिचर कीस लराई बरनिसि बिबिधि प्रकार।

कुंभकरन घननाद कर बल पौरुष संघार।।67ख।।

निसिचर निकर मरन बिधि नाना। रघुपति रावन समर बखाना।।

रावन बध मंदोदरि सोका। राज बिभीषन देव असोका।।

सीता रघुपति मिलन बहोरी। सुरन्ह कीन्हि अस्तुति कर जोरी।।

पुनि पुष्पक चढ़ि कपिन्ह समेता। अवध चले प्रभु कृपा निकेता।।

जेहि बिधि राम नगर निज आए। बायस बिसद चरित सब गाए।।

                                        

करेसि बहोरि राम अभिषेका। पुर बरनत नृपनीति अनेका।।

कथा समस्त भुसुंड बखानी। जो मैं तुम्ह सन कही भवानी।।

सुनि सब राम कथा खगनाहा। कहत बचन मन परम उछाहा।।

सोरठा-गयउ मोर संदेह सुनेउँ सकल रघुपति चरित।

भयउ राम पद नेह तव प्रसाद बायस तिलक।।68क।।

मोहि भयउ अति मोह प्रभु बंधन रन महुँ निरखि।

चिदानंद संदोह राम बिकल कारन कवन।।68ख।।

देखि चरित अति नर अनुसारी। भयउ हृदयँ मम संसय भारी।।

सोइ भ्रम अब हित करि मैं माना। कीन्ह अनुग्रह कृपानिधाना।।

जो अति आतप ब्याकुल होई। तरु छाया सुख जानइ सोई।।

जौं नहिं होत मोह अति मोही। मिलतेउँ तात कवन बिधि तोही।।

सुनतेउँ किमि हरि कथा सुहाई। अति बिचित्र बरु बिधि तुम्ह गाई।।

निगमागम पुरान मत एहा। कहहिं सिद्ध मुनि नहिं संदेहा।।

संत बिसुद्ध मिलहिं परि तेही। चितवहिं राम कृपा करि जेही।।

राम कृपाँ तव दरसन भयऊ। तव प्रसाद सब संसय गयऊ।।

दोहा-सुनि बिहंगपति बानी सहित बिनय अनुराग।

                                        

पुलक गात लोचन सजल मन हरषेउ अति काग।।69क।।

श्रोता सुमति सुसील सुचि कथा रसिक हरि दास।

पाइ उमा अति गोप्यमपि सज्जन करहिं प्रकास।।69ख।।

बोलेउ काकभसुंड बहोरी। नभग नाथ पर प्रीति न थोरी।।

सब बिधि नाथ पूज्य तुम्ह मेरे। कृपापात्र रघुनायक केरे।।

तुम्हहि न संसय मोह न माया। मो पर नाथ कीन्हि तुम्ह दाया।।

पठइ मोह मिस खगपति तोही। रघुपति दीन्हि बड़ाई मोही।।

तुम्ह निज मोह कहि खग साईं। सो नहिं कछु आचरज गोसाईं।।

नारद भव बिरंचि सनकादी। जे मुनिनायत आतमबादी।।

मोह न अंध कीन्ह केहि केही। को जग काम नचाव न जेही।।

तृस्नाँ केहि न कीन्ह बौराहा। केहि कर हृदय क्रोध नहिं दाहा।।

दोहा-ग्यानी तापस सूर कबि कोबिद गुन आगार।

केहि कै लोभ बिडंवना कीन्ह न एहिं संसार।।70क।।

श्री मद बक्र न कीन्ह केहि प्रभुता बधिर न काहि।

मृगलोचनि के नैन सर को अस लाग न जाहि।।70ख।।

गन कृत सन्यपात नहिं कोही। कोउ न मान मद तजेउ निबेही।।

जोबन ज्वर केहि नहिं बलकावा। ममता केहि कर जस न नसावा।।

                                        

मच्छर काहि कलंक न लावा। काहि न न सोक समीर डोलावा।।

चिंता साँपिनि को नहिं काया। को जग जाहि न ब्यापी माया।।

कीट मनोरथ तारु सरीरा। जेहि न लाग घुन को अस धीरा।।

सुत बित लोक ईषना तीनी। केहि कै मति इन्ह कृत न मलीनी।।

यह सब माया कर परिवारा। प्रबल अमिति को बरनै पारा।।

सिव चतुरानन जाहि डेराहीं। अपर जीव केहि लेखे माहीं।।

दोहा- ब्यापि रहेउ संसार महुँ माया कटक प्रचंड।

सेनापति कामादि भट दंभ कपट पाषंड।।71क।।

सो दासी रघुबीर कै समुझैं मिथ्या सोपि।

छूट न राम कृपा बिनु नाथ कहउँ पद रोपि।।71ख।।

जो माया सब जगहि नचावा। जासु चरित लखि काहुँ न पावा।।

सोइ प्रभु भ्रू बिलास खगराजा। नाज नटी इव सहित समाजा।।

सोइ सच्चिदानंद घन रामा। अज बिग्यान रूप बल धामा।

ब्यापक ब्याप्य अखंड अनंता। अखिल अमोघसक्ति भगवंता।।

अगुन अदभ्र गिरा गोतीता। सबदरसी अनवद्य अजीता।।

निर्मम निराकार निरमोहा। नित्य निरंजन सुख संदोहा।।

प्रकृति पार प्रभु सब उर बासी। ब्रह्म निरीह बिरज अबिनासी।।

                                        

इहाँ मोह कर कारन नाहीं। रबि सन्मुख तम कबहुँ कि जाहीं।।

दोहा- भगत हेतु भगवान प्रभु राम धरेउ तनु भूप।

किए चरित पावन परम प्राकृत नर अनुरूप।।72क।।

जथा अनेक बेष धरि नृत्य करइ नट कोइ।

सोइ सोइ भाव देखावइ आपुन होइ न सोइ।।72ख।।

असि रघुपति लीला उरगारी। दनुज बिमोहनि जन सुखकारी।।

जे मति मलिन बिषयबस कामी। प्रभु पर मोह धरहिं इमि स्वामी।।

नयन दोष जा कहँ जब होई। पीत बरन ससि कहुँ कह सोई।।

जब जेहि दिसि भ्रम होइ खगेसा। सो कह पच्छिम उयउ दिनेसा।।

नौकारूढ़ चलत जग देखा। अचल मोह बस आपुहि लेखा।।

बालक भ्रमहिं न भ्रमहिं गृहादी। कहहिं परस्पर मिथ्याबादी।।

हरि भिषइक अस मोह बिहंगा। सपनेहुँ नहिं अग्यान प्रसंगा।।

मायाबस मतिमंद अभागी। हृदयँ जमनिका बहुबिधि लागी।।

ते सठ हठ बस संसय करहीं। निज अग्यान राम पर धरहीं।।

दोहा-काम क्रोध मद लोभ रत गृहासक्त दुखरूप।

ते किमि जानहिं रघुपतिहि मूढ़ परे तम कूप।।73क।।

                                        

निर्गुन रूप सुलभ अति सगुन जान नहिं कोइ।

सुगम अगम नाना चरित सुनि मुनि मन भ्रम होइ।।73ख।।

सुनु खगेस रघुपति प्रभुताई। कहउँ जथामति कथा सुहाई।।

जेहि बिधि मोह भयउ प्रभु मोही। सोउ सब कथा सुनावउँ तोही।।

राम कृपा भाजन तुम्ह ताता। हरि गुन प्रीति मोहि सुखदाता।।

तोते नहिं कछु तुम्हहिं दुरावउँ। परम रहस्य मनोहर गावउँ।।

सुनहु राम कर सहज सुभाऊ। जन अभिमान न राखहिं काऊ।।

संसृत मूल सूलप्रद नाना। सकल सोक दायक अभिमाना।।

ताते करहिं कृपानिधि दूरी। सेवक पर ममता अति भूरी।।

जिमि सिसु तन ब्रन होइ गोसाईं। मातु चिराव कठिन की नाईं।।

दोहा-जदपि प्रथम दुख पावइ रोवइ बाल अधीर।

ब्याधि नास हित जननी गनति न सो सिसु पीर।।74क।।

तिमि रघुपति निज दास कर हरहिं मान हित लागि।

तुलसिदास ऐसे प्रभुहि कस न भजहु भ्रम त्यागि।।74ख।।

राम कृपा आपनि जड़ताई। कहउँ खगेस सुनहु मन लाई।।

जब जब राम मनुज तनु धरहीं। भक्त हेतु लीला बहु करहीं।।

                                        

तब तब अवधपुरी मैं जाऊँ। बालचरित बिलोकि हरषाऊँ।।

जन्म महोत्सव देखउँ जाई। बरष पाँच तहँ रहउँ लोभाई।।

इष्टदेव मम बालक रामा। शोभा बपुष कोटि सत कामा।।

निज प्रभु बदन निहारि निहारी। लोचन सुफल करउँ उरगारी।।

लघु बायस बपु धरि हरि संगा। देखउँ बालचरित बहु रंगा।।

दोहा-लरिकाईं जहँ जहँ फिरहिं तहँ तहँ संग उड़ाउँ।

जूठनि परइ अजिर महँ सो उठाइ करि खाउँ।।75क।।

एक बार अतिसय सब चरित किए रघुबीर।

सुमिरत प्रभु लीसा सोई पुलकित भयउ सरीर।।75ख।।

कहइ भसुंड सुनहु खगनायक। रामचरित सेवक सुखदायक।।

नृपमंदिर सुंदर सब भाँती। खचित कनक मनि नाना जाती।।

बरनि न जाइ रुचिर अँगनाई। जहँ खेलहिं नित चारिउ भाई।।

बाल बिनोद करत रघुराई। बिचरत अजिर जननि सुखदाई।।

मरकत मृदुल कलेवर स्यामा। अंग अंग प्रति छबि बहु कामा।।

नव राजीव अरुन मृदु चरना। पदज रुचिर नख ससि दुति हरना।।

ललित अंक कुलिसादिक चारी। नूपुर चारु मधुर रवकारी।।

                                        

चारु पुरट मनि रचित बनाई। कटि किंकिनि कल मुखर सुहाई।।

दोहा-रेखा त्रय सुंदर उदर नाभी रुचिर गँभीर।

उर आयत भ्राजत बिबिधि बाल बिभूषन चीर।।76।।

अरुन पानि नख करज मनोहर। बाहु बिसाल बिभूषन सुंदर।।

कंध बाल केहरि दर ग्रीवा। चारु चिबुक आनन छबि सींबा।।

कलबल बचन अदर अरुनारे। दुइ दुइ दसन बिसद बर बारे।।

ललित कपोल मनोहर नासा। सकल सुखद ससि कर सम हासा।।

नील कंज लोचन भव मोचन। भ्राजत भाल तिलक गोरोचन।।

बिकट भृकुटि सम श्रवन सुहाए। कुंचित कच मेचक छबि छाए।।

पीत झीनि झगुली तन सोहि। किलकनि चितवनि भावति मोही।।

रूप रासि नृप अजिर बिहारी। नाचहिं निज प्रतिबिंब निहारी।।

मोहि सन करहिं बिबिधि बिधि क्रीड़ा। बरनत मोहि होति अति ब्रीड़ा।।

किलकत मोहि धरन जब धावहिं। चलउँ भागि तब पूप देखावहिं।।

दोहा-आवत निकट हँसहिं प्रभु भाजत रुदन कराहिं।

जाउँ समीप गहन पद फिरि फिरि चितइ पराहिं।।77क।।

प्राकृत सिसु इव लीला देखि भयउ मोहि मोह।

                                        

कवन चरित्र करत प्रभु चिदानंद संदोह।।77ख।।

एतना मन आनत खगराया। रघुपति प्रेरित ब्यापी माया।।

सो माया न दुखद मोहि काहीं। आन जीव इव संसृत नाहीं।।

नाथ इहाँ कछु कारन आना। सुनहु सो सावधान हरिजाना।।

ग्यान अखंड एक सीताबर। माया बस्य जीव सचराचर।।

जौं सब कें रह ग्यान एकरस। ईस्वर जीवहि भेद कहहु कस।।

माया बस्य जीव अभिमाना। ईस बस्य माया गुनखानी।।

परबस जीव स्वबस भगवंता। जीव अनेक एक श्रीकंता।।

मुधा भेद जद्यपि कृत माया। बिनु हरि जाइ न कोटि उपाया।।

दोहा-रामचंद्र के भजन बिनु जो चह पद निर्बान।

ग्यानवंत अपि सो नर पसु बिनु पूँछ बिषान।।78क।।

राकापति षोड़स उअहिं तारागन समुदाइ।

सकल गिरिन्ह दव लाइअ बिनु रबि राति न जाइ।।78ख।।

ऐसेहिं हरि बिनु भजन खगेसा। मिटइ न जीवन्ह केर कलेसा।।

हरि सेवकहि न ब्याप अबिद्या। प्रभु प्रेरित ब्यापइ तेहि बिद्या।।

ताते नास न होइ दास कर। भेद भगति बाढ़इ बिहंगबर।।

भ्रम तें चकित राम मोहि देखा। बिहँसे सो सुनु चरित बिसेषा।।

                                        

तेहि कौतुक कर मरमु न काहूँ। जाना अनुज न मातु पिताहूँ।।

जानु पानि धाए मोहि धरना। स्यामल गात अरुन कर चरना।।

तब मैं बागि चलेउँ उरगारी। राम गहन कहँ भुजा पसारी।।

जिमि जिमि दूरि उड़ाउँ अकासा। तहँ भुज हरि देखउँ निज पासा।।

दोहा-ब्रह्मलोक लगि गयउँ मैं चितयउँ पाछ उड़ात।

जुग अँगुल कर बीच सब राम भुजहि मोहि तात।।79क।।
सप्ताबरन भेद करि जहाँ लगें गति मोरि।

गयउँ तहाँ प्रभु भुज निरखि ब्याकुल भयउँ बहोरि।।79ख।।

मूदेउँ नयन त्रसित जब भयऊँ। पुनि चितवत कोसलपुर गयऊँ।।

मोहि बिलोकि राम मुसुकाहीं। बिहँसत तुरत गयउँ मुख माहीं।।

उधर माझ सुनु अंडज राया। देखेउँ बहु ब्रह्मांड निकाया।।

अति बिचित्र तहँ लोक अनेका रचना अधिक एत ते एका।।

कोटिन्ह चतुरानन गौरीसा। अगनित उडगन रबि रजनीसा।।

अगनित लोकपाल जम काला। अगनित भूधर भूमि बिसाला।।

सागर सरि सर बिपिन अपारा। नाना भाँति सृष्टि बिस्तारा।।

सुर मुनि सिद्ध नाग नर किंनर। चारि प्रकार जीव सचराचर।।

                                        

दोहा-जो नहिं देखा नहिं सुना जो मनहूँ न समाइ।

सो सब अद्भुत देखेउँ बरनि कवनि बिधि जाइ।।80क।।

एक एक ब्रह्मांड महुँ रहउँ बरष सत एक।।

एहि बिधि देखत फिरउँ मैं अंड कटाह अनेक।।80ख।।

लोक लोक प्रति भिन्न बिधाता। भिन्न बिष्नु सिव मनु दिसित्राता।।

नर गंधर्ब भूत बेताला। किंनर निसिचर पसु खग ब्याला।।

देव दनुज गन नाना जाती। सकल जीव तहँ आनहि भाँती।।

महि सरि सागर सर गिरिनाना। सब प्रपंच तहँ आनइ आना।।

अंडकोस प्रति प्रति निज रूपा। देखेउँ जिनस अनेक अनूपा।।

अवधपुरी प्रति भुवन निनारी। सरजू भिन्न भिन्न नर नारी।।

दसरथ कौसल्या सुनु ताता। बिबिध रूप भरतादिक भ्राता।।

प्रति ब्रह्मांड राम अवतारा। देखउँ बालबिनोद अपारा।।

दोहा-भिन्न भिन्न मैं दीख सबु अति बिचित्र हरिजान।

अगनित भुवन फिरेउँ प्रभु राम न देखेउँ आन।।81क।।

सोइ सिसुपन सोइ सोभा सोइ कृपाल रघुबीर।

भुवन भुवन देखत फिरउँ प्रेरित मोह समीर।।81ख।।

भ्रमत मोहि ब्रह्मांड अनेका। बीते मनहुँ कल्प सत एका।।

फिरत फिरत निज आश्रम आयउँ। तहँ पुनि रहि कछु काल गवायउँ।।

                                        

निज प्रभु जन्म अवध सुनि पायउँ। निरभर प्रेम हरषि उठि धायउँ।।

देखउँ जन्म महोत्सव जाई। जेहि बिधि प्रथम कहा मैं गाई।।

राम उदर देखेउँ जग नाना। देखत बनइ न जाइ भखाना।।

तहँ पुनि देखेउँ राम सुजाना। माया पति कृपाल भगवाना।।

करउँ बिचार बहोरि बहोरि। मोह कलिल ब्यापित मति मोरी।।

उभय घरी महँ मैं सब देखा। भयउँ भ्रमित मन मोह बिसेषा।।

दोहा-देखि कृपाल बिकल मोहि बिहँसे तब रघुबीर।

बिहँसतहिं मुख बाहेर आयउँ सुनु मतिधीर।।82क।।

सोइ लरिकाई मो सन करन लगे पुनि राम।

कोटि भाँति समुझावउँ मनु न लहइ बिश्राम।।82ख।।

देखि चरित यह सो प्रभुताई। समुझत देह दसा बिसराई।।

धरनि परेउँ मुख आव न बाता। त्राहि त्राहि आरत जन त्राता।।

प्रेमाकुल प्रभु मोहि बिलोकी। निज माया प्रभुता तब रोकी।।

कर सोरज प्रभु मम सिर धरेऊ। दीनदयाल सकल दुख हरेऊ।।
कीन्ह राम मोहि बिगत बिमोहा। सेवक सुखद कृपा संदोहा।।

प्रभुता प्रथम बिचारि बिचारी। मन महँ होइ हरष अति भारी।।

                                        

भगत बछलता प्रभु कै देखी। उपजी मम उर प्रीति बिसेषी।।

सजल नयन पुलकित कर जोरी। कीन्हउँ बहु बिधि बिनय बहोरी।।

दोहा-सुनि सप्रेम मम बानी देखि दीन निज दास।

बचन सुखद गंभीर मृदु बोले रमानिवास।।83क।।

काकभसुंडि माग बर अति प्रसन्न मोहि जानि।।

अन्मादिक सिधि अपर रिधि मोच्छ सकल सुख खानि।।83ख।।

ग्यान बिबेक बिरति बिग्याना। मुनि दुर्लभ गुन जे जग नाना।।

आजु देउँ सब संसय नाहीं। मागु जो तोहि भाव मन माहीं।।

सुनि प्रभु बचन अधिक अनुरागेउँ। मन अनुमान करन तब लागेउँ।।

प्रभु कह देन सकल सुख सही। भगति आपनी देन न कही।।

भगति हीन गुन सब सुख ऐसे। लवन बिना बहु बिंजन जैसे।।

भजन हीन सुख कवने काजा। अस बिचारि बोलेउँ खगराजा।।

जौं प्रभु होइ प्रसन्न बर देहू। मो पर करहु कृपा अरु नेहू।।

मन भावत बर मागउँ स्वामी। तुम्ह उदार उर अंतरजामी।।

दोहा-अबिरल भगति बिसुद्ध तव श्रुति पुरान जो गाव।

जेहि खोजत जोगीस मुनि प्रभु प्रसाद कोउ पाव।।84क।।

भगत कल्पतरु प्रनत हित कृपा सिंधु सुख धाम।

                                        

सोइ निज भगति मोहि प्रभु देहु दया करि राम।।84ख।।

एवमस्तु कहि रघुकुलनायक। बोले बचन परम सुखदायक।।

सुनु बायस तैं सहज सयाना। काहे न मागसि अस बरदाना।।

सब सुख खानि भगति तैं मागी। नहिं जग कोउ तोहि सम बड़भागी।।

जो मुनि कोटि जतन नहिं लहहीं। जे जप जोग अनल तन दहहीं।।

रीझेउँ देखि तोरि चतुराई। मागेहु भगति मोहि अति भाई।।

सुनु बिहंग प्रसाद अब मोरें। सब सुभ गुन बसिहहिं उर तोरें।।

भगति ग्यान बिग्यान बिरागा। जोग चरित्र रहस्य बिभागा।।

जानब तैं सबही कर भेदा। मम प्रसाद नहिं साधन खेदा।।

दोहा-माया संभव भ्रम सब अब न ब्यापहहिं तोहि।

जानेसु ब्रह्म अनादि अज अगुन गुनाकर मोहि।।85क।।

मोहि भगत प्रिय संतत अस बिचारि सुनु काग।

कायँ बचन मन मम पद करेसु अचल अनुराग।।85ख।।

अब सुनु परम बिमल मम बानी। सत्य सुगम निगमादि बखानी।।

निज सिद्धांत सुनावउँ तोही। सुनु मन धरु सब तजि भजु मोही।।

मम माया संभव संसारा। जीव चराचर बिबिधि प्रकारा।।

                                        

सब मम प्रिय सब मम उपजाए। सब ते अधिक मनुज मोहि भाए।।

तिन्ह महँ द्विज द्विज महँ श्रुतिधारी। तिन्ह महुँ निगम धरम अनुसारी।।

तिन्ह महँ प्रिय बिरक्त पुनि ग्यानी। ग्यानिहु ते अति प्रिय बिग्यानी।।

तिन्ह ते पुनि मोहि प्रिय निज दासा। जेहि गति मोरि न दूसरि आसा।।

पुनि पुनि सत्य कहउँ तोहि पाहीं। मोहि सेवक सम प्रिय कोउ नाहीं।।

भगतिहीन बिरंचि किन होई। सब जीवहु सम प्रिय मोहि सोई।।

भगतिवंत अति नीचउ प्रानी। मोहि प्रानप्रिय असि मम बानी।।

दोहा-सुचि सुसील सेवक सुमति प्रिय कहु काहि न लाग।

श्रुति पुरान कह नीति असि सावधान सुनु काग।।86।।

एक पिता के बिपुल कुमारा। होहिं पृथक गुन सील अचारा।।

कोउ पंडित कोउ तापस ग्याता। कोउ धनवंत सूर कोउ दाता।।

कोउ सर्बग्य धर्मरत कोई। सबह पर पितहि प्रीति सम होई।।

कोउ पितु भगत बचन मन कर्मा। सपनेहुँ जान न दूसर धर्मा।।

सो सुत प्रिय पितु प्रान समाना। जद्यपि सो सब भाँति अयाना।।

एहि बिधि जीव चराचर जेते। त्रिजग देव नर असुर समेते।।

अखिल बिस्व यह मोर उपाया। सब पर मोहि बराबरि दाया।।

तिन्ह महँ जो परिहरि मद माया। भजै मोहि मन बच अरु काया।।

                                        

दोहा-पुरुष नपुंसक नारि वा जीव चराचर कोइ।

सर्ब भाव भज कपट तजि मोहि परम प्रिय सोइ।।87क।।

सोरठा-सत्य कहउँ खग तोहि सुचि सेवक मम प्रानप्रिय।

अस बिचारि भजु मोहि परिहरि आस भरोस सब।87ख।।

कबहूँ काल न ब्यापिहि तोहि। सुमिरेसु भजेसु निरंतर मोहि।।

प्रभु बचनामृत सुनि न अघाऊँ। तनु पुलकित मन अति हरषाऊँ।।

सो सुख जानइ मन अरु काना। नहिं रसना पहिं जाइ बखाना।।

प्रभु सोभा सुख जानहिं नयना। कहि किम सकहिं तिन्हहि नहिं बयना।।

बुह बिधि मोहि प्रबोधि सुख देई। लगे करन सिसु कौतुक तेई।।

सजल नयन कछु मुख करि रूखा। चितइ मातु लागी अति भूखा।।

देखि मातु आतुर उठि धाई। कहि मृदु बचन लिए उर लाई।।

गोद राखि कराव पय पाना। रघुपति चरित ललित कर गाना।।

सोरठा-जेहि सुख लागि पुरारि असुभ बेष कृत सिव सुखद।

अवधपुरी नर नारि तेहि सुख महुँ संतत मगन।।88क।।

सोई सुख लवलेस जिन्ह बारक सपनेहुँ लहेउ।

ते नहिं गनहिं खगेस ब्रह्मसुखहि सज्जन सुमति।।88ख।।

                                        

मैं पुनि अवध रहेउँ कछु काला। देखेउँ बालबिनोद रसाला।।

राम प्रसाद भगति बर पायउँ। प्रभु पद बंदि निजाश्रम आयउँ।।

तब ते मोहि न ब्यापी माया। जब ते रघुनायक अपनाया।।

यह सब गुप्त चरित मैं गावा।। हरि माया जिमि मोहि नचावा।।

निज अनुभव अब कहउँ खगेसा। बिनुहरि भजन नजाहिं कलेसा।।

राम कृपा बिनु सुनु खगराई। जानि न जाइ राम प्रभुताई।।

जाने बिनु न होइ परतीती। बिनु परतीति होइ नहिं प्रीती।।

प्रीति बिना नहिं भगति दिढ़ाई। जिमि खगपति जलकैचिकनाई।।

सोरठा-बिनु गुर होइ कि ग्यान ग्यान कि होइ बिराग बिनु।

गावहिं बेद पुरान सुख कि लहिअ हरि भगति बिनु।।89क।।

कोउ बिश्राम कि पाव तात सहज संतोष बिनु।

चलै कि जल बिनु नाव कोटि जतन पचि पचि मरिअ।।89ख।।

बिनु संतोष न काम नसाहीं। काम अछत सुख सपनेहुँ नाहीं।।

राम भजन बिनु मिटहिं कि कामा। थल बिहीन तरु कबहुँ कि जामा।।

बिनु बिग्यान कि समता आवइ। कोउ अवकास कि नभ बिनु पावइ।।

श्रद्धा बिना धर्म नहिं होई। बिनु महि गंध कि पावइ कोई।।

                                        

बिनु तप तेज कि कर बिस्तारा। जल बिनु रस कि होइ संसारा।।

सील कि मिल बिनु बुध सेवकाई। जिमि बिनु तेज न रूप गोसाँई।।

निज सुख बिनु मन होइ कि थीरा। परस कि होइ बिहीन समीरा।।

कवनिउ सिद्धि कि बिनु बिस्वासा। बिनु हरि भजन न भव भय नासा।।

दोहा-बिनु बिस्वास भगति नहिं तेहि बिनु द्रवहिं न रामु।

राम कृपा बिनु सपनेहुँ जीव न लब बिश्रामु।।90क।।

अस बिचारि मतिधीर तजि कुतर्क संसय सकल।

भजहु राम रघुबीर करुनाकर सुंदर सुखद।।90ख।।

निज मति सरिस नाथ मैं गाई। प्रभु प्रताप महिमा खगराई।।

कहेउँ न कछु करि जुगुति बिसेषी। यह सब मैं निज नयनन्हि देखी।।

महिमा नाम रूप गुन गाथा। सकल अमित अनंत रघुनाथ।।

निज निज मति मुनि हरि गुनि गावहिं। निगम सेष सिव पार न पावहिं।।

तुम्हहि आदि खग मसक प्रजंता। नभ उड़ाहिं नहिं पावहिं अंता।।

तिमि रघुपति महिमा अवगाहा। तात कबहुँ कोउ पाव कि थाहा।।

रामु काम सत कोटि सुभग तन। दुर्गा कोटि अमित अरि मर्दन।।

सक्र कोटि सत सरिस बिलासा। नभ सत कोटि अमित अवकासा।।

                                        

दोहा-मरुत कोटि सत बिपुल बल रबि सत कोटि प्रकास।

ससि सत कोटि सुसीतल समन सकल भव त्रास।।91क।।

काल कोटि सत सरिस अति दुस्तर दुर्ग दुरंत।

धूमकेतु सत कोटि सम दुराधरष भगवंत।।91ख।।

प्रभु अगाध सत कोटि पताला। समन कोटि सत सरिस कराला।।

तीरथ अमित कोटि सम पावन। नाम अखिल अघ पूग नसावन।।

हिमगिरि कोटि अचल रघुबीरा। सिंधु कोटि सत सम गंभीरा।।

कामधेनु सत कोटि समाना। सकल काम दायक भगवान।।

सारद कोटि अमित चतुराई। बिधि सत कोटि सृष्टि निपुनाई।।

बिष्नु कोटि सम पालन कर्ता। रुद्र कोटि सत सम संहराता।।

धनद कोटि सत सम धनवाना। माया कोटि प्रपंच निधाना।।

भार धरन सत कोटि अहीसा। निरवधि निरुपम प्रभु जगदीसा।।

छन्द-निरुपम न उपमा आन राम समान रामु निगम कहै।

जिमि कोटि सत खद्योत सम रबि कहत अति लघुता लहै।।

एहि भाँति निज निज मति बिलास मुनीस हरिहि बखानहीं।

प्रभु भाव गाहक अति कृपाल सप्रेम सुनि सुख मानहीं।।

                                        

दोहा- रामु अमित गुन सागर थाह कि पावइ कोइ।

संतन्ह सन जस किछु सुनेउँ तुम्हहि सुनायउँ सोइ।।92क।।

सोरठा-भाव बस्य भगवान सुख निधान करुना भवन।

तजि ममता मद मान भजिअ सदा सीता रवन।।92ख।।

सुनि भुसुंडि के बचन सुहाए। हरषित खगपति पंख फुलाए।।

नयन नीर मन अति हरषाना। श्रीरघुपति प्रताप उर आना।।

पाछिल मोह समुझि पछिताना। ब्रह्म अनादि मनुज करि माना।।

पुनि पुनि काग चरन सिरु नावा। जानि राम सम प्रेम बढ़ावा।।

गुर बिनु भव निधि तरइ न कोई। जौं बिरंचि संकर सम होई।।

संसय सर्प ग्रसेउ मोहि ताता। दुखद लहरि कुतर्क बहु ब्राता।।

तब सरूप गारुड़ि रघुनायक । मोहि जिआयउ जन सुखदायक।।

तव प्रसाद मम मोह नसाना। राम रहस्य अनूपम जाना।।

दोहा-ताहि प्रसंसि बिबिधि बिधि सीस नाइ कर जोरि।

बचन बिनीत सप्रेम मृदु बोलेउ गरुड़ बहोरि।।93क।।

प्रभु अपने अबिबेक ते बूझउँ स्वामी तोहि।

कृपासिंधु सादर कहहु जानि दास निज मोहि।।93ख।।

                                        

तुम्ह सर्बग्य तग्य तम पारा। सुमति सुसील सरल आचारा।।

ग्यान बिरति बिग्यान निवासा। रघुनायक के तुम्ह प्रिय दासा।।

कारन कवन देह यह पाई। तात सकल मोहि कहहु बुझाई।।

राम चरित सर सुंदर स्वामी। पायहु कहाँ कहहु नभगामी।।

नाथ सुना मैं अस सिव पाहीं। महा प्रलयहुँ नास तव नाहीं।।

मुधा बचन नहिं ईस्वर कहई। सोउ मोरें मन संसय अहई।।

अग जग जीव नाग नर देवा। नाथ सकल जगु काल कलेवा।।

अंड कटाह अमित लय कारी। कालु सदा दुरतिक्रम भारी।।

सोरठा- तुम्हहि न ब्यापत काल अति कराल कारन कवन।

मोहि सो कहहु कृपाल ग्यान प्रभाव कि जोग बल।।94क।।

दोहा-प्रभु तव आश्रम आएँ मोर मोह भ्रम भाग।

कारन कवन सो नाथ सब कहहु सहित अनुराग।।94ख।।

गरुड़ गिरा सुनि हरषेउ कागा। बोलेउ उमा परम अनुरागा।।

धन्य धन्य तव मति उरगारी। प्रस्न त&